By Alma L. Tingcang
|
PAGADIAN
CITY, June 19 - - - Ang Malacanang
miingon nga anaa sa mga local government units ang responsibilidad
pagpahibalo sa mga ginikanan kalabot sa pagsuspenso sa mga klase base sa
ilang assessment sa makusog nga ulan sa ilang dapit, ug dugang miingon nga
ang sistema sa deklarasyon niini kinahanglan molambo aron maseguro nga ang
mga estudyante dili mahimutang sa peligro.
Sa
regular press briefing didto sa Malacanang kagahapon, si Presidential
Spokesperson Edwin Lacierda miingon nga ang pagdeklarar sa pagsuspenso sa
klase nagdepende sa sitwasyon sa mga lugar, ubos sa pagbuot o paghukom sa mga
lokal nga hepe ehekutibo.
“Pananglitan
dinha sa mga lugar diin gipataas ang Signal No. 2, klaro kayo nga suspensohon
ang mga klase sa high school ug elementarya. Apan ubos kini sa pagbuot sa
local nga kagamhanan, sama pananglitan kun adunay pagbaha sa maong lugar ug
dili kini maagian, kung ang kahimtang sa panahon makabalda sa mga eskwelahan
pagpadayon sa ilang operasyon. Ug kung ang local nga kagamhanan nasayod
niini, nan, ang local nga kagamhanan makabuot nga isuspenso kini,” si
Lacierda miingon.
Si
Lacierda miingon nga ang pag-anunsiyo sa mga mayor kinahanglan himoon ug sayo
o kaha sa dili pa mobiya ang mga estudyante sa ilang panimalay aron
pagtambong sa ilang klase.
Gumikan
sa nagpadayong makusog nga ulan sukad niadtong Dominggo sa gabii, ang mga
klase sa nagkalain-laing dapit sa Metro Manila ug Luzon gisuspenso. Ang
nagpadayong pag-ulan miresulta ngadto sa pagbaha sa maong mga dapit ug
kasilinganang lungsod.
Kahinumduman
nga ang Department of Education bag-o pa lamang miduso ug bag-ong polisiya
nga nagbalhin sa deklarasyon pagsuspenso sa klase ngadto sa mga local nga
opisyales sa kagamhanan. (ALT-PIA9/Zambo Sur)
|
