|
MANILA, May 19 - - Si
Presidente Benigno Aquino III nangulo sa mga opisyales ug empleyado sa
Commission on Higher Education (CHED) diha pagsaulog sa ika-18 nga Founding
Anniversary sa usa ka seremonya nga gipahigayon sa CHED headquarters,
Diliman, Quezon City niadtong nakalabay nga Huwebes.
Kauban sa presidente si CHED chairperson Patricia Licuanan,
Budget Secretary Florencio Abad, Senador Edgardo Angara ug Congressman Juan
Edgardo Angara sa Aurora province.
Gisaksihan usab sa presidente ang ceremonial signing sa usa ka
manifesto sa mga representante sa Philippine Association of State
Universities and Colleges (PASUC) pinangulohan sa ilang presidente nga si
Ricardo Rotoras nga mitimaan sa ilang suporta ug misaad pagpatuman sa mga
reporma nga nalangkob diha sa Roadmap of Public Higher Education Reform
2011-2016.
Ang nasangpit nga roadmap adunay siyam ka proposals nga
nagtumong aron mapalambo ug himoong mas epektibo ang pagpadagan sa mga
state colleges ug universities.
Ang PASUC, nga gilangkoban sa 110 SUCs sa nasod misaad sa
pagpatuman niining mga reporma ug pagbuhat niini sa tumang kamatinud-anon,
may integridad ug maayong pagpangulo.
Gipahalipayan sa presidente ang mga miyembro ug representante
sa PASUC ug miingon nga ang manifesto usa ka lakang na usab padulong sa
matul-id nga dalan sa kalamboan gikan sa karaang sistema sa edukasyon.
Matod niya nga ang maong manifesto mas nakapalig-on sa
educational system sa nasod aron mahatagan ug kahigayonan ang mga
estudyante nga
mapalambo ang ilang kinabuhi.
“Sa pagsaulog sa inyong ika-18 nga anibersaryo, dili lang kay
gipalig-on nato ang nasugdan nga pundasyon sa edukasyon, kung dili giapilan
pa nato kini ug daghang paningkamot aron matuman ang atong mga damgo. Sa
atong agenda nga kausaban, atong giila ang mga problema busa ato kning
aksiyonan alang sa usa ka malungtarong solusyon,” dugang pahayag sa
presidente. (ALT-PIA9/Zambo Sur)
.
|