Pinal nga kasabutan sa kalinaw uban sa MILF, ipublikar una sa di pa pirmahan, matod pa ni Deles

ni Alfonso TY. Ruda

DIPOLOG CITY, MAY 20(PIA)--- Walay pinal nga kasabutan nga pirmahan ang gobyerno hangtud nga dili kini mapahibalo sa katawhan. Kini ang gipasalig ni Presidential Adviser on the Peace Process, Secretary Teresita Deles ngadto sa mga representante sa Civil Society Organizations, niadtong Biyernes.

“Walay tinaguan agenda pag-abot na sa negosasyon sa gobyerno uban sa Moro Islamic Liberation Front o sa bisan asa mang grupo, kabahin niana,” matod pa ni Deles sa gipahigayong konsultasyon didto sa Lantaka Hotel sa Dakbayan sa Zamboanga niadtong Biyernes. “Ang saad sa gobyerno nga sa dili pa inisyalan ang unsa mang dokumento aron pirmahan, kinahanglan una kining mapublikar.” 

Usa sa serye sa konsultasyon uban sa publiko para sa sinultihay uban sa gobyerno ug MILF, ang miting naghatag sa magtalambag sa kalinaw ug kahigayonan aron mahatagan ug kasayuran ang publiko sa kalambuan ug dagan sa negosasyon, ingon man pagpatin-aw sa mga mitambong sa mga isyo nga wala pa nila maklaro. 

“Gusto namong mapagawas ang plano nga motubag sa problema sa partido nga among gikasulti. Sa samang higayon, kinahanglang madawat kini dili lang sa usa ka grupo kundili sa kinatibuk-ang katawhang Filipinhon. Butang nga makita sa tibuok kalibutan nga kini ang labing maayong butang nga ikatanyag sa gobyerno ilalom sa usa ka sitwasyon,” padayon pa ni Deles sa paghupay sa kabalaka sa pipila ka sektor nga nahadlok sa di-maayong sangputan sa posibling kasabutan sa kalinaw uban sa MILF.

Midugang pa ni Deles nga nagtrabaho sila pinasikad sa prinsipyo sa “consent of the governed” nga mao ang legacy sa  demokrasya nga napanunod ni Presidente Benigno Aquino III gikan sa iyang mga ginikanan. Matod pa ni Deles, gihatagan ug dakong bili sa Presidente ang maong prinsipyo aron masiguro nga ang unsa mang pinal nga kasabutan nga sudlan sa gobyerno dunay suporta gikan sa katawhan. Gumikan niini, kini ang nagsilbing giya sa Office of the Presidential Adviser on the Peace Process ug sa mga negosyador sa gobyerno sa pagpahigayon sa negosasyon.

Sa maong miting, gipasabot sa Kalihim ang Memornadum of Instruction gikan sa Presidente nga nagsilbing gabayan sa mga negosyador sa gobyerno sa gipahigayong negosasyon.

“Nakakat-on na kamig leksyon gikan sa nangagi. Ug ang labing ulahing nahitabo mao ang 2008 MOA-AD ( Memorandum of Agreement on Ancestral Domain Claim),” matod pa ni Deles. Ang nasangpit nga kasabutan dideklarar sa Korte Suprema nga supak sa Konstitusyon, gumikan sa kakulang sa konsultasyon uban sa publiko.

Laing instruksyon ug guiding principle sa Presidente mao ang katakos sa gobyerno nga ihatod ang gisaad ug nakasabutan. Kinahanglanmadawat  kini sa katawhan “politically, economically, socially, ug nahasubay sa ilang kultura.

Ang among tuyo nga makapagawas ug labing maayong kasulbaran nga ikatanyag ang gobyerno. Butang nga makatarunganon ug kayang himoon,” matod pa ni Deles(ATR/PCOO/PIA9-Zambo Norte)