ni
Franklin P. Gumapon
DIPOLOG CITY, May 28 (PIA) - - Gipasabot sa Palasyo ang pagkapili ni
Sonia Brady isip ambassador sa China nga kini adunay hataas nga kasinati-an ug angayan
nga maghupot sa maong posisyon.
Gisaysay ni Deputy Spokesperson Abigail Valte karong bag-o, dugay na nga
nag-alagad si Brady sa Department of Foreign Affairs (DFA) ug gipili siya ni
Pangulong Benigno Simeon C. Aquino III tungod sa iyang abilidad sa paghupot sa
maong katungdanan.
Dugang ni Valte nga gusto sa Presidente nga ang matudlo pagka-ambassador
ngadto sa nasud sa China mao kadtong usa ka tawo nga nasayud sa kultura, dagan
sa pulitika, ug uban pang kalihukan sa maong nasud.
Sigun pa ni Valte, si Brady dugay na nga nag-alagad sa DFA, ngani kanhi
ambassador siya sa maong nasud niadtong 2006 hangtud sa 2010. Sa wala pa siya
maghupot sa maong posisyon, ang una niyang assignment sa gawas mao ang Beijing
busa angayan siya sa nasampit nga posisyon.
Naglaum si Valte nga sa gihuptan nga kwalipikasyon ni Brady, gilauman nga
dali siyang makalabang sa Commission on Appointments.
Si Brady nahimong ambassador ngadto sa Beijing kaniadtong 2006-2010, sa
Thailand niadtong tuig 2002-2003, ug sa Myanmar sa tuig 1995-1999.
Nahimo usab siyang deputy chief of mission ngadto sa Indonesia sa
1994-1995, sa Thailand niadtong 1992-1994, third secretary dayon vice consul ug
second secretary and consul sa Beijing, China sa 1976-1978.
Natudlo si Brady isip Undersecretary sa Foreign Affairs for policy gikan
sa 2003-2006.
Natapos ni Brady ang Master of Arts in International Relations degree
gikan sa University of Southern California, B.S. Foreign Service degree sa
University of the Philippines ug A.B. Journalism sa University of Sto. Tomas.
(FPG/PCOO/PIA-Zamboanga del Norte)