ni Alfonso T. Ruda
DIPOLOG CITY, MAY
5(PIA)--- Gipasalig
sa gobyerno nga tabangan ang mga banana exporters nga dunay problema sa ilang
produkto nga makasulod sa merkado sa Tsina gumikan sa kasamtangang stand-off
tali sa PIlipinas ug sa nasangpit nga nasod gumikan sa pag-angkon sa Scarborrough
Shoal.
Sa
gipahigayong press briefing sa Malakanyang niadtong Biyernes, gipahayag ni
Deputy Presidential spokesperson Abigail Valte, nga ilang ipaabot ang maong
isyo sa mga hingtungdang ahensiya sa gobyerno aron matabangan ang mga banana
exporters sa ilang problema.
Gumikan
sa nagpadayong stand-off tali sa Pilipinas ug Tsina, ang mga banana exporters
nagkanayon nga nagpahamtang ang merkado sa Tsina ug mas higpit nga regulasyon
batok sa mga saging nga gikan sa Pilipinas.
“Among
hisgutan kining maong problema uban sa mga hingtungdang ahensiya. Duna na kamiy
gipangutana niadtong una sa Department of Agriculture kabahin sa problema sa
mga mag-uuma ug saging ug mga nag-export ug saging, apan amo usab kining tukion
uban sa DA,” matod pa ni Valte.
“Basta
kon ang relasyon ang hisgutan, padayon kaming nagsultihanay… usa lang kini sa atong
hitsura uban sa Tsina. Halapad ang atong relasyon uban kanila ug naglaum lang
kita nga dili kini maka-apektar sa ubang bahin sa atong relasyon uban kanila.
Gipahayag
sa mga lokal nga nagprodyus ug saging nga posibling magdulot ug di-maayong
epekto ang tensiyon sa Pilipinas ug Tsina, gumikan sa higpit nga regulasyon nga
gi-imposar sa nasangpit nga nasod batok sa mga saging nga gikan dinhi sa nasod.
Sumala
pa sa mga banana exporters, ang isyo sa Scarborrough shoal, mahimong usa lang
ka isyong politikanhon, apan posibli usab kining magdulot ug di-maayong epekto
sa relasyon sa patigayon sa duha ka nasod.(ATR/PCOO/PIA9-Zambo
Norte)
