ni Alfonso T. Ruda
DIPOLOG CITY, MAY
28(PIA)--- Usa ka grupo
sa mga Ulamas kon Islamic Scholars ang nakadawat ug pasalig sa kamatinud-anon
sa gobyerno sa kasamtangang pagpakignegosasyon niini uban sa Moro Islamic
Liberation Front (MILF).
Si
GPH Panel member Dr. Hamid Bara miingon ngadto sa mga memebro sa Philippine Usrah
Foundation Inc., nga nakabase sa Dakbayan
sa Marawi City nga dili na kuwestiyon ang sinseridad sa gobyerno sa negosasyon
tungod kay kanunay man kining sinsero sa negosasyon.
Si
Bara nagpahigayon ug konsultasyon uban sa mga Islamic Scholars, sayo ug usa ka bulan
sa sunod nga hugna sa negosasyon nga ipahigayon sa Kuala lumpur karong
semanaha. Si Bara, usa ka Aleem, Islamic scholar nga mihalad sa iyang pagtoon
sa kasaysayan sa Islam, balaod ug dalan sa kinabuhi. Ang Ulama mao ang plural
form sa Aleem.
Ang
Islamic forum gitambungan sa mga Ulamas gikan sa lungsod sa Ramain, Maranto,
Masiw, ug Bacolod sa Lanao del Sur, Islamic educators gikan sa Mindanao State
University, Jamiatu Marawi-Al Islamia Foundation, ug Qualishi International
School.
Matod
pa ni Aleem Dean Talib Benito, mahinungdanon ang maong forum tungod napabati sa
mga Ulamas ang ilang opinion kabahin sa negosasyon. Naglaum si Benito nga
mapirmahan na ang pinal nga kasabutan tali sa gobyerno ug MILF sa di pa ang
piniliay sa 2013.
Sa
maong forum gipahibalo ni Bara ang kalambuan sa negosasyon, ingon man ang unod
sa Decision Points on Principle nga gipirmahan sa mga negosyador sa gobyerno ug
MILF didto sa Kuala lumpur, Malaysia niadtong Abril 24.
Gi-awhag
usab ni Aleem Abdul Salam Disomimba ang iyang mga kaubang mga scholars nga mangilabot
sa proseso sa kalinaw.
Isip
tubag sa maong panawagan, si Shariah Court Judge Aboali Cali misugyot sa
pagmugna ug national ug local contact group nga maoy modala sa mga balidong
problema ug sugyot sa mga Bangsamoro ngadto sa duha ka panel.
Naglaum
si Cali nga konsiderahon ang maong sugyot apan iyang gihatagan ug pag-ila ang
pagpaningkamot nga gihimo karon sa International Contact Group ug International
Monitoring Committee.
Ang
ICG nga gilangkuban sa mga member sa international government ug non-government
groups, gitahasan paghatag sa gikinahanglang tabang ug suporta aron mapadayon
ang pagsalig ug kompiyansa sa duha ka panel sa negotiating table.
Samtang
sa laing bahin, ang IMT usa usab ka grupo nga nagmonitor sa pagpatuman sa
ceasefire, civilian protection component, rehabilitasyon ug kalambuan ug mga
socio-economic agreements tali sa gobyerno ug MILF. Ang IMT sa mga
representante gikan sa Malaysia, Brunie, Libya, Norway, ug European Union.
Sa
laing bahin, giisa usab ni Aleem Ustadj Omar ang isyo kabahin sa giingong
delaying tactics nga nahitabo sa negosasyon, nga matod pa niya, nahitabo
kaniadto hangtud karon.
Hinuon,
subling gisiguro ni Bara nga sinsero ang panel sa gobyerno sa pag-umol sa kasabutan
nga makasulbad sa dugay na kaayong problema sa Bangsamoro.
Gidawat
ni Bara ang tanang mga suhestiyon ug problema nga iya kining ipaabot sa panel
sa di pa magsugod ang laing hugna sa sinultihay.
Ang
mga negosyador sa gobyerno ug MILF nakatakdang magkita pag-usab karong semanaha
aron tukion ug ayo ang mga mahinungdanong isyo sa negosasyon.(ATR/PCOO/PIA9-Zambo Norte).