ni Alfonso T. Ruda
DIPOLOG CITY, APR.
25(PIA)--- Pormal
nang gilusad kagahapon (Abril 25,) ni Presidente Benigno Aquino III didto sa Malakanyang
ang Kindergarten to Year 12 kon K+12 Basic Education Program sa Departamento sa
Edukasyon.
Sa
iyang pagpakigpulong atol sa paglusad sa bag-ong programa, si Presidente Aquino
miingon nga kining maong adlaw nagtimaan sa usa ka makasaysayanong yugto diin
ang tanang estudianteng Filipinhon nahatagan ug kahigayonan nga makakat-on ug
matuhog ang ilang nakat-onan sa mas maayong klaseng tunghaan.
“Sugod
karong adlawa, nahatagan na nato ang atong mga kabataan ug mas maanindot nga
kahigayonan nga makakat-on ug makaangkon ug kinaadman,” matod pa sa Presidente.
Ang
central feature sa K+12 Program mao ang pag-upgrade sa Basic Education
Curriculum aron masiguro nga makuha sa mga magtutungha ang gikinahanglang
kinaadman ug katakos ug mahimong produktibong membro sa atong katilingban.
Sumala
pa sa Pamuno Nasod, uban sa iyang pormal nga paglusad, ang K+12 program makahatag
na sa mga estudiante ug malig-ong pundasyon sa edukasyon nga ilang magamit sa
pagpalambo sa ilang kinabuhi.
“Aron
mapagawas ang gihuptan nga katakos sa estudiante, atong hatagan ug igu-igong
panahon nga makat-onan sa mga kabataan ang mga konsepto ug katakos, ang mga
tukmang lihok ug kinaiya,” ang Presidente nagkanayon.
“Ang
atong gusto nga makaangkon ug lig-on nga pundasyon sa edukasyon ang mga mosunod
nga henerasyon sa mga Filipino,” siya midugang.
Iyang
gihatagan ug gibug-aton ang kamahinungdanon niining bag-ong programa nga iyang
gitawag ug investment sa labing importanteng bahandi, ang katawhgn Filipinhon.
“Mobarog
kita sa atong gisaad nga kausaban sa edukasyon, nga himoon kining sentro sa
estratehiya isip puhonan sa atong labing bililhon nga bahandi, ang katawhang
Filipinhon,” matod pa ni Presidente Aquino.
“Sa
K+12 program, nagtoo ako nga mahatagan ug
kusog si Juan de la Cruz nga mapalambo dili lamang ang iyang
kaugalingong pamilya kundili hangtud na ang tibuok nasod,” midugang pa ang
Presidente.
“Niining
adlawa, milakang kita padulong sa pagkab-ot sa kausaban sa atong sistema sa
edukasyon,” panapos pa ni Presidente Aquino.(ATR/PCOO/PIA9-Zambo
Norte)