Ni Alma L. Tingcang
PAGADIAN CITY, April 2 - - - Ang mga Pilipino nga nagtrabaho sa Cambodia menos ug problema kung ikumpara niadtong atua sa ubang nasod, ang embahador ngadto sa Cambodia nagkanayon dili pa lamang dugay.
“Kami dinhi sa embahada wala kaayo problema kalabot sa mga overseas Filipino workers (OFWs), dili sama sa ubang embahada sa Middle East, Hongkong ug uban pa,’’ si Ambassador Noe Wong mibutyag ngadto sa Radio TV Malacanang sa usa ka interview.
“Usa kini ka hulagway kung unsa kahayahay ug maayo ang pagpanarbaho sa mga Pinoy dinhi, nga anaa sa mga garments factory, casinos, hotel ug restaurants, ug sa mga bangko.’’
Ang kalainan mao nga sa Cambodia, kasagaran sa mga Pnoy nagbaton ug supervisory functions ug dili mga ordinaryong trabahante. Kadaghanan kanila nagtrabaho isip managers sa garments factory, food and beverage services, matod pa ni Wong.
Ang kinaiya ug batasan sa mga Pilipino mao ang kalidad diin nakabentaha sila kaysa ubang katawhan sa Asean.
Ingon man ang maayong pag-atiman ug kahanas sa lengwaheng English maoy tinuod nga mas nakabentaha kanila kaysa ubang nasyonalidad, matod ni Wong.
“Kana pipila lamang sa mga kalidad sa Pinoy, apan ang matuod mao nga ang atong human resources maoy nakapalahi kanato, ug mao kini dinhi ang nakadiperensiya kanato sa uban.’’
“Ang mga magtutudlong Pinoy puwede usab mopahimulos sa oportunidad aron pagtudlo ug English didto sa Cambodia tungod kay daghang Cambodians ang gusto makat-on ug aron pagkab-ot sa globalisasyon,” si Wong mipahayag.
Sa pagkakaron, adunay 400 magtutudlo sa Cambodia nga anaa nagtrabaho sa mga international schools.
Aron pagpalapad sa ayuda sa gobyerno ingon man mahatagan ug oportunidad ang mga OFWs, si Wong miingon nga nagpahigayon sila ug mobile consular services sa borders sa Thailand, Cambodia ug Vietnam.
Adunay 4,497 mga Pilipino kinsa opisyal nga nakarehistro sa Philippine Embassy didto sa Cambodia apan ang kinatibuk-ang talaan lakip kadtong undocumented mokabat sa 6,000, matod pa.
Gawas pa niadtong mga propesyonal nga nagtrabaho sa mga pribadong kumpanya, adunay nagtrabaho sa international nga grupo sama sa United Nations Children’s Fund, United Nations Development Programme ingon man mga religious ug advocacy groups.
Si Presidente Benigno Aquino III gitakdang moabot sa Cambodia karong gabii aron pagtambong sa Association of Southeast Asian Nations (ASEAN) Summit ug 45th Anniversary sa organisasyon. (ALT-PCOO/PIA9/Zambo Sur)
