ni Alfonso T. Ruda
DIIPOLOG CITY, APR.25(PIA)---Gipahayag ni Presidente Benigno
Aquino III kagahapon nga magpabilin ang presensiya sa Pilipinas sa
Panatag(Scarborrough Shoal).
“Ang
Philippine Coast Guard magpabilin sa iyang presensiya. Nagtoo kita nga ato
kining tubig, busa dunay katungod ang atong mga barko nga magpabilin niining
maong tubig,” pahayag pa sa Hepe Ehikutibo sa usa ka pakighinabi sa mga
tigbalita sa Malakanyang.
Sumala
pa sa Hepe Ehikutibo, si Vice Admiral Edmund Tan sa Phil. Coast Guard mitaho
kaniya nga hangtud karon wala pay di-maayong insidente nga nahitabo. “Ang taho
kanako sa Coast Guard nga wala namay isyo, hangtud karon. Walay di maayong panghitabo,”
matod pa niya.
Gipakita
pa gani ni Presidente Aquino ang mapa sa media aron pamatud-an ang iyang punto
nga ang Panatag Shoal naa gyud sulod sa hurisdiksyon sa Pilipinas.
Kabahin
sa gipahigayong military exercise tali sa Tsina ug Rusya, ang Presidente nagtoo
nga wala kiniy kalabutan sa isyo sa Panatag Shoal.
Ang
administrasyong Aquino nagpabiling misaad sa padayong konsultasyon uban sa
Tsina padulong sa malinawon ug diplomatikanhong solusyon sa isyo sa Panatag
Shoal(Scarborrough Shoal).
Naglaum
ang Presidente nga masulbad ra ang problema sa Scarborrough Shoal sa malinaw,
diplomatikanhon ug legal nga paagi.
Sumala
pa sa Departamento sa Kalihokang Langyaw, ang Bajo de Masinloc usa ka parte sa
Pilipinas ug tipik sa lungsod sa Masinloc, sa lalawigan sa Zambales. Nahimutang
kini 124 nautical miles sa kasadpan sa Zambales ug nasulod sa 200 ka nautical
miles nga Exclusive Economic Zone ug Philippine Continental Shelf(ATR/PCOO/PIA9-Zambo Norte).