Ni Alma L. Tingcang
PAGADIAN CITY, April 2 - - - Usa ka okupado nga schedule ang nagpaabot kang Presidente Benigno Aquino III sa iyang duha ka adlaw nga pagtambong sa 20th Asean Summit didto sa Phnom Penh. Sa Miyerkoles, alas 9 sa buntag, siya makig-uban sa iyang mga Asean counterparts sa ika-20 nga Asean Summit Retreat didto sa Peace Palace diin ipahigayon ang panagtagbo. Pagka alas 12:15 sa hapon, ang presidente ug ubang pangulo sa Asean magtagbo alang sa concluding session sa 20th Asean Summit. Human niana, makig-uban siya sa 8th Brunei-Indonesia-Malaysia-Philippines East Asian Growth Area (BIMP-EAGA) Summit. Ang ubang mga opisyales nga gitakdang motambong usab naglakip sa mga ministro sa BIMP, presidente sa Asian Development Bank, ang Asean Secretary General, BIMP-EAGA national secretariat ug ang BIMP-EAGA Facilitation Center. Makigtagbo usab siya sa Filipino community didto sa Cambodia pagka alas 4 sa hapon didto sa Hotel Sofitel. Si Ambassador Noe Wong sa Cambodia mohatag sa welcome remarks nga pagasundan ug usa ka mensahe gikan sa pangulo sa Filipino community sa Cambodia. Mohatag usab ug pakigpulong ang presidente ngadto sa mga Pilipino didto, ug sa alas 5:50 sa hapon, mopauli na siya balik sa Manila. Ang mohatod sa presidente mao ang mga opisyales sa Cambodia, si Ambassador Wong, permanenteng representante sa Asean nga si Wilfredo Villacorta, ug Defense Force Attache sa Cambodia, Col. Manuel M. Orduna. (ALT-PCOO/PIA9-Zambo Sur) |
