ni Claro A. Lanipa
Pagadian City, Mar. 28 (PIA) – Aron sa pagtubag sa mga pangutana sa kadaghahan sa mga out-of-school youth kon ang Special Program for Employment of Students (SPES), sa Department of Labor and Employment (DOLE alang ba usab kanila, si Secretary Rosalinda Dimapilis-Baldoz miingon “Oo.”
“Oo, ang SPES alang usab kanila,” miingon si Baldoz, sa diha iyang gipalutaw nga ang popular ‘bridging employment ‘ program nagtinguha sa pagtuboy sa pag-empleyo sa mga batan-ong tawo lakip usab ang mga out-of-school youths (OSYs).
“Ang titulo sa programa nailhan isip “pag-empleyo sa mga estudyante” apan ang balaod nagmugna sa SPES, tin-aw nagpadayag nga alang usab kini sa mga OSY ug sa mga disadvantaged ug anak sa mga nawad-an o kaha hapit na mawad-an ug trabaho nga mga mamumuo diha sa lokal nga level,” miingon si Bladoz.
Ang program gimugna niadtong 1992 ubos sa Akta Republika No. 7323, nga gi-amendar sa RA 9547, ang SPES bukas alang sa tanang kuwalipikadong high school, college o vocational/technical nga tinun-an ug out-of school-youth.
Ubos sa maong Akta, mga tinun-an o OSY mahimong mo-apply sa SPES sa mosunod nga mga criteria: (1) 15 to 25 años ang pang-edaron; (2) net income tax sa ginikanan, lakip iyang kaugalingon kita, kon naa, ug dili molapas sa pinaka-ulahing regional poverty threshold level alang sa pamilya unom ang miyembro; (3) ug ang aplikante kinahanglan adunay average passing grade panahon sa katapusang tuig tingtungha (alang sa estudyante).
Kuwalipikadong OSY mahimong mobisita sa Public Employment Service Office (PESO) sa ilang dapit ug mosubmitir sa mga kinahanglanon sa SPES, lakip ang accomplished application form, kopya sa birth certificate, kopya sa pinaka-ulahing income tax return sa ginikanan o BIR certification nga ang ginikanan exempted sa pagbayad ug buhis, ug certificate of good moral character gikan sa otorisadong opisyal sa barangay nga iyang gipuy-an.
Certification gikan sa school registrar nga adunay date sa katapusang enrolment ug kopya sa original class card kon Form 138, mao kini ang dugang mga kinahanglanon alang sa estudyanteng aplikante.
Interesadong aplikante mahimong mosusi sa PESO network directory sa Bureau of Local Employment’s website sa http:/ble.dole.gov.ph/pesodir.asp. (DOLE/PIA9/CAL)