ni Alfonso T. Ruda
DIPOLOG CITY, MARCH 21(PIA)--- Malipayon karong gidawat sa Malakanyang ang gihimo sa Kagamhanan sa Syria nga pagdili sa mga Overseas Filipino Workers (OFWs) nga manarbaho sa maong nasod, samtang padayong naningkamot ang gobyerno pagpapauli sa mga OFWs nga naipit sa kagubot sa maong nasod.
Giluwatan ni Deputy Presidential spokesperson Abigail Valte ang pahayag sa gipahigayong press briefing sa Malakanyang human madawat ang taho nga nag-isyo ang Syrian Ministry of Interior ug Decision Order no. 50 niadtong Marso 4 nga wala maglakip sa mga Filipino sa listahan sa mga langyawng gitugutang makatrabaho sa maong nasod.
“Kon imong tan-awon ang situwasyon, nakatabang kanato, Hinumdomi nga naningkamot kita nga mapapauli ang atong kaigsoonan nga tua sa maong nasod. Ang ban makatabang sa atong tinguha nga malikayan ang pagsulod sa mga Filipino sa Syria sa kasamtangan,” matod pa ni Valle.
Ang deployment ban gipatuman sa Kagamhanan sa Pilipinas sa pagkakaron gumikan sa nagakagrabeng kondisyon sa kahusay ug kalinaw sa maong nasod.
Kining maong impormasyon gipaabot na sa Department of Foreign Affairs sa Philippine Overseas Employment Administration(POEA) alang sa pag-isyo sa tukmang gabayan.
Mahinumdoman nga giisa sa DFA ang alert level 4 sa Syria niadtong Disyembre 22, 2011 ug kasamtangan na karong gipatuman sa gobyerno ang pagpapauli sa mga OFWs nga tua sa maong nasod ug gusto nang mobalik dinhi sa Pilipinas.
Ang Rapid Response Team nga gilangkuban sa mga personahe sa DFA, Department of Labor and Employment ug Department of Interior and Local Government (DILG) nagpabilin pa karon sa Syria aron motabang pagpapauli sa mga OFWS nga naipit sa kagubot sa maong nasod, partikularmente ang mga OFWs sa lalawigan sa Homs, Hama Idlib ug Dara a.(ATR/PCOO/PIA-Zambo Norte)