ni Alfonso T. Ruda
DIPOLOG CITY, MARCH 21(PIA)--- Ang Malakanyang mipahinumdom karon sa mga buhatan sa kagamhanan kabahin sa kasamtangang gabayan sa pagkonserbar ug enerhiya, taliwala sa padayong pagsaka sa presyo sa mga produktong petrolyo.
“Aduna pay nagbarog nga Administrative Order no. 126 series of 2005 nga nagmando sa tanang ahensiya sa gobyerno pagkonserbar sa enerhiya,” matod pa ni Deputy Presidential spokesperson Abigail Valte sa gipahigayong press briefing sa Malakanyang kagahapon.
Dihang gipangutana kabahin sa plano sa Malakanyang kon unsaon pagpaubos ang konsumo sa enerhiya sa mga buhatan sa kagamhanan, si Valte miingon nga usa sa mga lakang nga gihimo karon sa gobyerno may kalabutan sa maong kamanduan, mao ang pagpalong sa mga suga ug mga air-conditioning units sa mga buhatan panahon sa tingpaniudto.
Apan sa pagkakaron, misagop na ang mga buhatan sa Malakanyang ug office plotting system nga magpakita sa kasamtangang dagan sa konsumo sa gas ug enerhiya ug sa hinay-hinay ang pagpakunhod sa konsumo sa gas ug enerhiya.
Ang Administrative Order No. 126 kon ang kamanduan nga “Strengthening Measures to Address the Extraordinary Increase in World Prices, Directing the Enhanced Implementation of the Government’s Energy Conservation Program and for Other Purposes” giisyo sa nakalabayng administrasyon niadtong 2005.
Ang kamanduan nanawagan sa tanang mga ahensiya sa gobyerno, mga korporasyon nga gipanag-iya ug kontrolado sa gobyerno ug mga institusyong pinansyal, nga mosagop ug dugang lakang aron malimitihan ang paggamit sa supply sa produktong petrolyo ug enerhiya.
Lakip sa mga ahensiyang gitahansan ni Presidente Benigno Aquino III nga magdesinyo ug mga estratehiya ug mopatuman sa maong kamanduan mao ang Department of Energy, Department of Trade and Industry ug Department of Environment and Natural Resources.(ATR/PCOO/PIA9-Zambo Norte)