Ni Alma L. Tingcang
PAGADIAN CITY, March 7 (PIA) - - Ang Malacanang mipasalig nga ang pagserado sa pipila ka consular offices sa gawas sa nasod, ubos sa sugyot sa Department of Foreign Affairs (DFA) dili maka-apekto sa diplomatic relations sa Pilipinas, ug gihatagan ug kamahinungdanon ang austerity measures sa kagamhanan ug ang menos nga kalihokan sa mga opisina isip maoy basehan ug rason sa nasangpit nga pagtak-op.
“Wala kini mahimong epekto, ang pagserado sa mga consular offices depende lang kanato ug wala kini epekto sa mga hingtungdang nasod, basta anaa ang atong presensiya didto, aduna gihapon kitay diplomatic relations. Ang diplomatic relations dili makunhoran pinaagi sa pagserado sa mga consular offices sa ilang mga nasod,” si Presidential Spokesperson Edwin Lacierda nagkanayon sa gipahigayong press briefing sa Malacanang kagahapong adlawa.
Hinuon, giklaro ni Lacierda nga bisan pa man sa pagsira sa mga consular offices, himoon gihapon nga priyoridad sa gobyerno ang paningkamot aron matubag ang mga panginahanglan sa mga Overseas Filipino Workers (OFWs) didto sa laing nasod tungod kay “magtudlo kita ug mas daghan nga mga mobile consular nga opisyales” sa mga dapit diin mas daghan ang mga OFWs.
“Ang DFA midesisyon pagserado sa ubang mga embahada tungod sa problema sa budget…aron pagtabang sa mga OFWs, giset-up sa DFA ang mga mobile Consular officials ug mao kana ang usa ka paagi aron pagkuha sa kabalaka sa mga OFWs ug aron usab masulbad ang problema sa budget alang sa DFA,” matod ni Lacierda.
“Busa magtudlo kita ug mas daghang mobile consular officials, sama sa mga lugar diin daghan ang mga Pilipino. Mangutana kita sa DFA kung unsa ang basehan sa pagserado sa nga embahada… ang nag-unang rason mao nga wala kaayo daghang kalihokan didto,” dugang pahayag ni Lacierda.
Gibutyag dili pa lang dugay sa DFA nga napulo ka mga embahada ang iserado karon tuiga lakip niini ang consular offices sa Koror, Palau; Caracas, Venezuela; Barcelona, Spain; Stockholm, Sweden; Dublin, Ireland; Frankfurt, Germany; Havana, Cuba; Saipan; Bucharest, Romania ug Helsinki, Finland. (ALT-PIA9/Zambo Sur)