ni Alfonso T. Ruda
DIPOLOG CITY, MARCH 28(PIA)--- Gihupay karon sa Malakanyang ang kabalaka sa katawhan batok sa posibling di-makatarunganong pagsaka sa presyo sa nanag-unang paliton ug serbisyo gumikan sa padayon usab nga pagsaka sa presyo sa produktong petrolyo sa kalibutanong merkado uban ang pag-ingon nga padayon kining gibantayan sa Department of Trade and Industry(DTI), ang ahensiya sa gobyerno nga gitahasan sa maong gimbuhaton.
Sa gipahigayong press briefing sa Malakanyang kagahapon, gipahayag sa tigpamaba sa palasyo nga si Edwin Lacierda, nga higpit karong gibantayan sa DTI ang presyo sa nanag-unang mga palaliton aron malikayan ang di-makatarunganong pagsaka sa presyo niini.
Matod pa ni Lacierda, dunay gihimong senemanang survey ang DTI kabahin niini. “Medyo misaka ang presyo sa pipila ka mga palaliton, ilabi na ang mga produktong agrikultural ug merkado. Apan sa kinatibuk-an, nagpabilin pa gihapon ang presyo niini,” pahayag pa ni Lacierda.
Dugang pa ni opisyal, kompiyansa pa gihapon ang mga economic advisers sa palasyo nga magpabilin pa gihapon sulod sa target ang inflation rate, diin duna kiniy gibana-banang average nga 3 porsiento karong 2012. Ang Bangko Sentral ng Pilipinas (BSP) nagtakda sa average inflation rate karong tuiga gikan sa 3 ngadto sa 5 porisneto.
“Ang inflation rate nagpabilin sa 3 porsiento, ug pdayon namong tubagon ang presyo sa lana. Gilantaw karon sa BSP ang mas taas nga presyo sa matag baril sa lana sa dili pa mausab ang inflation rate. Gibana-banang naa kini sa mga 160 dolyares matag baril. Sa pagkakaron, ang presyo sa matag baril sa lana anaa sa mga 120 dolyares,” matod pa ni Lacierda.(ATR/PCOO/PIA9-Zambo Norte)