Ni Alma L. Tingcang
PAGADIAN CITY, January 31 - - Ang Pilipinas nagpabiling nangako aron mapaneguro ang kalinaw ug kamalungtaron sa Asia-Pacific region tungod sa usa ka mas malig-on nga military cooperation tali sa Estados Unidos.
“Gikan sa atong panglantaw, padayon kitang nanaad alang sa malahutayong kalinaw dinhi sa rehiyon. Ug sublion nato nga unsang mga panagbingkil, ato kining husayon sa diplomatikong pamaagi aron masulbad kini nga malinawon,” si Deputy Presidential Spokesperson Abigail Valte miingon sa usa ka press conference nga gipahigayon kagahapon sa Malacanang.
Mao kini ang tubag ni Valte sa usa ka pangutana kung angay ba mabalaka ang China sa isyu kabahin sa panaad sa Pilipinas ngadto sa kalinaw ug kamalig-on sa rehiyon.
Si Valte miingon nga dili gayud ikumpromiso sa Pilipinas ang kalinaw sa rehiyon tungod kay padayon ang atong bilateral relations tali sa ubang nasod.
Niadtong nakalabay’ng Dominggo, ang mga mamahayag sa China miingon nga ang ilang kagamhanan kinahanglan mopahamtang ug silot batok sa Pilipinas tungod sa pagtugot niini alang sa dugang tropa sa Estados Unidos sa ilang yuta. Ang maong pahayag migula tungod sa tensiyon sa West Philippine Sea (South China Sea).
Apan si Valte miingon nga gamay lamang kaayo kining tipik kung ikumpara sa maayong relasyon tali sa China ug Pilipinas. Gani, atong giduso ang turismo ug pagnegosyo nga mas gipalig-on sa pagbisita ni Presidente Benigno Aquino III sa China niadtong nakalabay nga tuig.
Ang China, Pilipinas ug Vietnam adunay magkaribal nga pag-angkon sa bahin sa West Philippine Sea, usa ka dapit nga nahimutang sa labing importanteng agianan sa mga maglalawig sa kalibotan ug gituohang adunay dakong deposito sa fossil fuel. Ang ubang miangkon sa gikagubtang Spratly Islands naglakip sa Taiwan, Brunei ug Malaysia.
Niadtong miaging tuig, ang Pilipinas ug Vietnam mireklamo tungod sa giingon nga agresibong lihok sa China kabahin sa dugay na kaayong panagbangi. (ALT-PIA9/Zambo Sur)