DIPOLOG CITY, JAN. 27(PIA)---Si Executive Secretary Paquito Ochoa, Jr., nanawagan sa mga opisyales ug empleyado sa gobyerno nga i-promote ug mosalmot sa “Bayanihan ng Bayan” Project sa administrasyong Aquino nga nagtinguhang tabangan nga makabarog ug balik ang mga biktima sa bagyong si Sendong dinhi sa Mindanao.
Sa Memorandum Circular No. 26 nga giisyo ni Ochoa niadtong Enero 25, giawhag niini ang tanang mga opisyales ug empleyado sa gobyerno nga suportahan ang Bayanihan ng Bayan sa dakbayan sa Iligan gikan sa Enero 25 ngadto sa 28, gumikan sa dakong kadaot nga naangkon sa maong lugar ug sa dakbayan sa Cagayan de Oro human nga mihapak ang bagyong si Sendong niadtong miaging bulan.
“Ang kalihokan nagpakita sa hiniusang pagtubag ug nagkalain-laing paagi sa pagtabang sa mga Filipino ngadto sa mga biktima sa bagyo. Nagtumong usab kini nga makakuha ug suporta gikan sa tanang bahin sa nasod alang sa pagpabarog ug balik sa mga apektadong bahin sa Northern Mindanao,” matod pa ni Ochoa.
Niadtong Miyerkules, gibisita ni Presidente Benigno Aquino III ang mga relocation sites sa dakbayan sa Iligan ug Cagayan de Oro aron ilusad ang shelter program para sa mga biktima sa bagyo. Gipasalig usab sa presidente ngadto sa mga kagamhanang-lokal ang kinatibuk-ang suporta sa nasudnong kagamhanan sa pagpabarog ug balik sa mga apektadong lugar sa rehiyon.
Sa Memorandum Circular No. 26, partikular niining gimanduan ang mga opisyales ug empleyado sa tanang departamento, bureau ug mga ahensiya sa nasudnong kagamhanan, ingon man mga korporasyon nga kontrolado ug gipanag-iya sa gobyerno nga suportahan ug mosalmot sa Bayanihan ng Bayan .(ATR/PIA9-Zambo Norte)