ni Alfonso T. Ruda
DIPOLOG CITY, JAN. 27(PIA)--- Sa tinguhang matubag ang panginahanglan sa manufacturing industry nga iyang gilauman nga mosulbong karong tuiga, si Presidente Benigno Aquino III miingon nga gitrabaho karon sa gobyerno ang mga tukmang lakang aron mapaubsan ang bayronon sa kuryente sa nasod.
Sa usa ka forum uban sa mga partisipantes sa Arangkada Philippines didto sa Mariott Hotel sa dakbayan sa Pasay kagahapon, ang Presidente miingion nga ang pagpaubos sa bayronon sa kuryente mao ang usa sa maghatag ug kadasig sa mga manufacturing industry nga magbutang ug shop dinhi sa Pilipinas.
“Sa inyong nahibaw-an, nag-antus ang manufacturing sa nasod gumikan sa kamahal sa kuryente, busa atong gipaningkamutan nga mapaubsan kini. Usa niini, pinaagi sa pagdasig nga dunay mobutang ug based-generating plants. Ug labaw sa tanan nga dunay bukas nga kahigayonan para sa kuryente ug pasiguro nga hingpit nga maglihok ang wholesale electricity spot,” matod pa sa Presidente.
Ang open access electricity market maghatag ug kahigayonan sa mga dagkong konsumante sa Luzon ug Visayas nga makapili sa ilang supplier sa kuryente nga sa inanay, himoon na sa tagsa-tagsa ka balay ka mga balay sa nasod.
Kining maong sitwasyon sukwahi sa nasinatian sa kasamtangan diin ang mga konsumante, mapugos na lang pagkuha ug kuryente gikan sa usa ka supplier, sanglit wala naman siyay kapilian tungod kay nag-inusara man lang kini.
“Sa pagkakaron, mahinungdanon nga mohimo kitag lakang aron madasig ang mga manufacturing companies nga mobalik sa ilang operasyon dinhi sa Pilipinas,” matod pa ni Presidente Aquino.(ATR/PIA9-Zambo Norte)