ni Alfonso T. Ruda
DIPOLOG CITY, JAN. 10(PIA)--- Si Presidente Benigno Aquino mimando karon sa Department of Budget and Management pagpagawas sa 1.1 bilyones ka pesos alang sa duha ka dagkong programa sa elektripikasyon sa National Electrification Administration (NEA).
Matod pa ni Budget Sec. Florencio “Butch” Abad, Php518.92 milyones sa maong pondo gamiton pagpatuman sa Barangay Line Enhancement Project (BLEP) aron mapalambo o ma-improve ang serbisyo sa kuryente sa 202 ka mga barangay sa nagkalain-laing bahin sa nasod.
Samtang sa laing bahin, Php589.32 usab gigahin alang sa Sitio Electrification Project (SEP) nga nagtumong nga madugtongan ug linya sa kuryente ang 833 ka mga sitios sa nasod gikan sa national power grid.
Matod pa ni Abad, ang NEA mitakda ug lima-ka-tuig nga target (2011-2015) para sa implementasyon sa BLEP ug SEP aron ma-improve ang serbisyo sa kuryente sa 2,341 ka mga barangay ug mahatagan ug sugang-dagitabnon sa 32,441 ka mga sitios sa tibuok nasod.
“Ang pagpagawas sa Php1.108 bilyones ka pesos maghatag ug kahigayonan sa NEA nga hatagan ug kuryente ang sitio nga wala ma-abti sa linya sa national power grid ug uban pang mga komunidad nga walay kuryente, ingon man pag-improve sa paghatod sa mga nanag-unang serbisyo sa mga hilit nga bahin sa nasod ug malikayan ang pagkawala sa supply sa kuryente ug uban pang problema nga dunay kalabutan sa koneksyon sa kuryente,” matod pa ni Abad.
Midugang pa si Abad, nga ang labing ulahing alokasyon idugang sa Php814 milyones nga unang gipagawas sa DBM ngadto sa NEA niadtong unang bahin sa 2011.
Sumala pa sa Kalihim, ang pasiunang gipagawas nga pondo naghatag ug oportunidad sa NEA nga mapasug-an ang 1,520 ka sitios nga walay kuryente, nga sobra pa kay sa 1,410 ka mga sitios nga gitarget sa nasangpit nga ahensiya.
Ang gipagawas nga pondo gikuha gikan sa Malampaya Fund.
“Sa paglampas sa ilang target sa sitio electrification, ang administrasyong Aquino, kauban sa Department of Energy ug NEA mimatuod lamang sa iyang commitment nga madugtongan ug linya sa kuryente gikan sa national power grid ang mga sitios nga walay kuryente. Pinaagi sa paghatag ug kuryente niining maong mga komunidad, nahatagan usab ug gahum ang daghanang mga Filipino, ilabi na kadtong nagpuyo sa mga hilit nga bahin sa nasod nga mahimong produktibong membro sa katilingban,” matod pa ni Abad.
Dugang pa sa Budget Secretary nga gawas sa kuryente, ang duha ka programa sa NEA magmugna usab ug dugang oportunidad sa trabaho ngadtp sa mga residente sa benepisyaryong lugar nga patrabahoon isip mga electrician ug mga laborer.
Gumikan sa paghatag ug kuryente sa mga barangay ug mga sitios mahimo nang magtuon ang mnga estudiante panahon sa kagabhon ug mahimo na usab nga magtrabaho ang ilang mga ginikanan bisan ug mosalop na ang adlaw.(ATR/PIA9-Zambo Norte)
