Ni Alma L. Tingcang
PAGADIAN CITY , Jan 10 (PIA) – Mokabat sa 1,400 migrant workers nga Pinoy sa Syria ang mipadangat sa ilang kagustohan nga mobalik dinhi sa Pilipinas taliwala sa nagkagrabeng sitwasyon ug kagubot didto sa nasangpit nga nasod.
Tipik lamang kini sa 5,600 OFWs nga nakarehistro sa Philippine embassy sa Damascus.
Ang kagamhanan sa Syria miingon nga adunay 10,000 OFWs didto apan ang kagamhanan sa Pilipinas miingon nga adunay sobra pa niini.
Ang Department of Foreign Affairs (DFA) nanawagan alang sa pagrehistro tungod kay kadaghanan sa mga OFWs didto sa Syria wala nalista sa Philippine Overseas Employment Administration (POEA) ug sa Overseas Workers Welfare Administration (OWWA).
“Adunay kalangay usahay sa pagpauli tungod kay dapat i-release una sila sa ilang mga employer aron hatagan sila sa gitawag nga exit visa. Dugay ang negosasyon. Nakigsultihanay pa kami sa ilang mga employers una sila paulion dinhi,” si DFA Undersecretary Esteban Conejos miingon.
Mokabat na sa 600 ang nakapauli lakip niini ang 56 nga miabot niadtong nakalabay nga Sabado.
Si Conejos miingon nga ang tanang nakapauli nga OFWs pulos mga babaye nga nagtrabaho isip domestic helpers sa nagkalain-laing dapit sa Syria.
Kadaghanan kanila wala miagi sa ideal recruitment process, nga nagmugna ug dakong hagit sa ilang pagpauli.
“Makaingon ako nga usa o duha lamang kanila ang miagi sa ensaktong proseso, ang uban wala na moagi sa POEA. Ang nag-recruit kanila mga Syrian recruiters gayud. Gidili kana sa atong balaod.” si Conejos nagkanayon.
Ang kagamhanan sa Pilipinas nag-implementar ug mandatory nga repatriation program human gipataas sa DFA ang crisis alert didto sa Syria ngadto sa level 4 pila ka semana na ang milabay.
Si Conejos miingon nga ang kagamhanan nagatutok sa upat ka lugar sa Syria nga mao ang Homs, Hama, Idlib ug Daraa – nga maoy grabeng naapektohan sa kagubot, ug midugang nga usa ka task force na ang gimugna aron pag-atiman sa mga OFWs didto. (ALT-PIA9/Zambo Sur)
