ni Franklin P. Gumapon
MANILA, Jan. 4 (PIA) - - Lagmit mahanaw na ang low pressure area (LPA) nga nahimutang duol sa sidlakang bahin sa dakbayan sa General Santos sulod sa 24 ngadto sa 48 oras gikan karon.
Kini ang pinakaulahing taho kabahin sa lakat sa panahon nga gipagawas sa buhatan sa PAG-ASA kon Philippine Atmospheric Geophysical and Astronomical Services Administration.
Hinoon, mipasidaan ang PAG-ASA nga ang sidlakang bahin sa Visayas ug Mindanao pabiling makasinati ug mga pag-ulan.
Matud pa ni Antonio Soriaga, weather observer sa PAG-ASA nga ang northeast monsoon kon amihan naka-apektar karon sa Luzon nga maoy hinungdan sa masinating pag-ulan ulan sa tibook isla sa Luzon.
Dugang pa ni Soriaga nga ang amihan lagmit magpabilin pa sa pipila ka mga adlaw ug kini maoy magdala ug ginagmayng pag-ulan-ulan didto sa Luzon lakip na ang Metro Manila.
Kusganon usab nga mihatag pasidaan ang PAG-ASA kabahin sa pagbunok sa ulan tungod sa LPA sa sidlakang Visayas ug Mindanao.
Ang maong buhatan nagkanayon usab nga kasarangan ngadto sa makusog nga hangin gikan sa amihanang sidlakan ang mohuros sa Luzon ug Visayas ug ang mga kadagatan niining mga lugara adunay kasarangan ngadto na sa makusog nga balud.
Ang ubang dapit sa nasud makasinati ug kasarangang paghuros sa hangin. (FRP/PIA-Zamboanga del Norte)
