ni Alfonso T. Ruda
DIPOLOG CITY,DEC. 31(PIA)— Taliwala sa nasinatiang kalibutanong pagkahugno sa kalibutanong ekonomiya, daghan pa gihapong mga Filipino ang nagpahayag ug paglaum kaysa nahadlok pagsulod sa tuig 2012.
Kini ang migawas nga resulta sa Fourth Quarter Survey nga gihimo sa Social Weather Station gikan sa Disyembre 4 ngadto sa 7, 2011.
Sumala pa sa SWS, 95 porsiento sa 1,200 ka mga respondents nga ilang personal nga nakahinabi nagpahayag ug usab ug paglaum pagsulod sa 2012, kumpara sa 4 ka porsiento lamang nga mibati ug kahadlok.
“Kini mitugma kon mitupong sa labing taas nga 95 porsiento nga narehistro niadtong 2002 nga nagpahayag ug paglaum sa pagsulod sa tuig 2003. Mas taas usab kini ug 2 ka porsiento kumpara sa 93 porsiento nga narehistro pagsulod sa bag-ong tuig sa 2011,” sumala pa sa SWS.
Ang resulta sa survey nagpakita nga taas ang porsiento sa mga nagpahayag ug paglaum dinhi sa Mindanao ug Metro Manila.
Ang paglaum sa bag-ong tuig taas usab sa tanang socio-economic classes, diin natala ang pinakataas sa class E (ang labing kabus nga economic class) nga 93 porsiento. Ang paglaum sa bag-ong tuig nagpabiling taas sa mas taas nga hut-ong sa katilingban, ang class ABC, apan halos wala kini mausab sa masa, kon class D nga nagpabilin sa 96 porsiento.(ATR/PIA9-Zambo Norte).