ni Franklin P. Gumapon
DIPOLOG CITY, Dec. 31 (PIA) - - Human sa dakung baha nga dala sa bagyong Sendong nga mibanlas sa libo-an ka pamilya sa mga dakbayan sa Cagayan de Oro ug Iligan, gipahibalo karon ni Secretary Corazon “Dinky “Juliano-Soliman sa Department of Social Welfare and Development (DSWD) nga tukoron sa maong buhatan ang usa ka child protection working group (CPWG) alang sa mga na-ilo, nanga-angol, ug mga nawad-an sa ilang mga pamilya.
Matud pa ni Soliman, ang CPWG gilangkoban sa mga representante sa non-government organizations (NGOs) nga nag-atiman sa pagpanalipod ug kaayuhan sa kabataan.
Dugang ni Soliman, ang DSWD mipahigayon karong bag-o sa psycho-social protection services ngadto sa mga kabataan ubos sa singko anyos.
Duha ka mga tents ang gibutang sa evacuation centers sa West City Central School, City Central School, Macasandig ug Bulua sa Cagayan de Oro diin didto ipahigayon ang counseling sessions nga ipahigayon sa may 79 ka youth facilitators ngadto sa mga kabataan.
Gibutyag sa kalihim sa DSWD nga ang nahimong resulta sa unang pagpahigayon sa counseling nagpakita nga hinay-hinay’ng napagawas sa mga nabiktima sa trahedya ang ilang kahadlok, kabalaka ug kahigwa-os gumikan sa pait nga trahedya.
Sa pagkakaron, gisirad-an na ang 12 ka evacuation center sa Cagayan de Oro ug tulo sa Iligan, apan padayon nga giatiman ang mga nabilin sa evacuation center sa Cagayan de Oro nga mikabat sa 4,664 ka pamilya ug laing 5,465 ka pamilya usab didto sa Iligan.
Gipayahag usab ni Soliman nga adunay 936 ka tawo gikan sa mga naigo sa trahedya ang gipasulod karon ug trabaho ubos cash-for-work program didto sa Cagayan de Oro. (FPG/PIA-Zamboanga del Norte)