DIPOLOG CITY, Nov. 8 (PIA) -- Dunay dakong epekto ang kausaban sa klima o “climate change” sa suplay sa tubig.
Kini mao ang pamahayag ni Rosevirico Tan, ang regional information officer sa Department of Environment and Natural Resources (DENR) sa rehiyon 9.
Gibutyag ni Tan nga mitaas na ang temperature sa kalibutan ngadto sa 0.7ºC sukad pa kaniadtong 1900 ug kini gituhuang mo-init pa sa mosunod nga dekada.
Dugang pa ni Tan, ang average global temperature lagmit mosaka pa ngadto sa 2-3ºC diin 20 ngadto sa 30 porsento sa tubig ang moubos pa sa ubang rehiyon o kaha makasinati ug taas nga hulaw, apan ang pikas bahin sa kalibutan makasinati ug mga pagbaha.
Nasayran nga sa mga dapit nga adunay grabeng pag-init, kusog and evaporation nga maoy hinungdan sa makusog nga ulan sa mga taas nga dapit nga maoy modala ug dagkung pagbaha.
Gipasabot ni Tan nga masinati sa katawhan ang epekto sa climate change pinaagi sa kausaban sa water distribution sa usa ka dapit lakip na ang tinubdan sa ilang ilimnong tubig.
Ang tubig mahinungdanon alang sa maayong panlawas ug sanitasyon, irigasyon sa mga pananum, hydro-electirc power plants ug uban pang kagamitan. (CIO-Dipolog/FPG/PIA-Zamboanga del Norte)