ni Franklin P. Gumapon
DIPOLOG CITY, July 10 (PIA) - - Gipaneguro sa
pamunu-an ni Pangulong benign Simeon C. Aquino III nga ang bag-ong palisiya sa
pagmina modani ug mga magpapatigayon gikan sa gawas ug sulod sa nasud.
Gipasabot ni Sekretaryo Ramon Paje sa Department of
Environment and Natural Resources (DENR) human migawas ang Executive Order No.
79 kabahin sa pagmina nga maka-agni ug mga negosyante.
Matud pa niya ang nakanindot sa maong palisiya mao
ang kabahin sa pagdaghan sa atong kita ug pagtubo sa buhis nga makuha unya
gikan sa pagmina.
Ang EO 79 nagtinguha sa pagpalambo sa industriya sa
pagmina dinhi sa nasud arun mosaka ang kita sa buhis alang sa ekonomikanhong
paglambo sa katawhan, dugang pa ni Paje.
Subay sa maong palisiya, hugtanon nga ipatuman sa
gobyerno ang mga mga balaud alang sa pag-amping sa kinaiyahan ug kadtong
nakasupak niini pahamtangan sa tukmang silot.
Sa laing bahin, gitahasan ang DENR sa pagpatuman ug
pagsusi sa Environmental Protection and Enhancement programs sa mga kompanya sa
mina pinaagi sa paggamit sa geo-hazard maps ug climate change forecasts arun
mailhan ang mga dapit nga mamahimong tugutan ang pagpahigayon sa pagmina.
Ang Mining Industry Coordinating Council gitahasan
usab sa nga tan-awon ang pagpadas-ug sa compulsory insurance coverage sa mga
mining areas ug pagsagop sa Comprehensive Environmental Response, Compensation
and Liability Act nga gipatuman sa America. (FPG/PCOO/PIA-Zamboanga del Norte)
