By Alma L. Tingcang
MANILA, June 6 - - Si
Presidente Benigno C. Aquino kinsa atua
karon sa London nakigtagbo sa mga nag-unang European business groups kagahapon ug
miresulta ngadto sa gatosan ka milyones nga bag-ong pamuhunan alang sa nasod.
Ang Philippine Associated
Smelting and Refining Corporation, nga gipanag-iya sa higanteng kompanyang
Glencore mipasalig nga mamuhunan ug gatosan ka milyones dinhi sa Pilipinas atol
sa ilang panagtigom kauban sa mga kadagkoan ug mga opisyales didto sa
Intercontinental London Parklane Hotel, diin atua usab naka-billet ang
delegasyon sa nasod.
Samtang si Secretary Ramon
Carandang sa Presidential Communications Development and Strategic Planning
Office miingon nga ang kompanyang Pasar/Glencore nagplano nga mo-invest ug 500
ngadto sa 600 milyones ka dolyar aron pagpalapad sa smelting capacity ingon man
pagtukod ug usa ka power plant aron pagsuporta sa ilang operasyon.
Si Carandang kinsa miuban
sa presidente sa pakigtagbo sa mga British investors kagahapon miingon nga
magmugna kini ug dugang 700 ka bag-ong trabaho.
Nakigtagbo usab ang presidente
sa mga opisyales sa Cebu Pacific Air Inc. ug Rolls=Royce ingon man sa mga executives
sa Asea Gaz Asia Ltd. ug Aboitiz Equity Ventures Gas.
Gisaksihan sa presidente and
pagpirma sa Memorandum of Understanding tali sa Rolls-Royce ug Cebu Pacific nga
naggahin sa US$280 milyon pag-angkon sa Cebu Pacific gikan sa Rolls-Royce ug
bag-ong Trent 700 engines alang sa hangtod walo ka leased Airbus aircraft nga
gamiton sa ilang operasyon sa tuig 2013.
Si Lance Gokongwei, president
ug CEO sa Cebu Pacific ug si Alan Webber , managing director ug deputy CEO sa
Royal Aero UK Ltd. mipirma sa maong kasabotan.
Misaksi usab ang presidente
sa pagpirma ug kasabotan tali sa Aboitiz Equity Ventures ug Gaz Asia Ltd.
Si Sabin Aboitiz, presidente
sa Pilmico ug director sa SN Aboitiz Power maoy mipirma kauban si Richard
Lilleystone, CEO sa Gaz Asia Ltd.
Ang hiniusang kasabotan
tali sa duha ka kompanya nagtagana aron pagmugna sa Asea Gaz Corporation nga
mopalambo sa mga planta ug mo-convert sa organic waste materials aron mahimong
liquid bio methane nga gamiton isip vehicle fuel. (ALT/PCOO/PIA9-Zambo Sur)
