ni Franklin
P. Gumapon
DIPOLOG CITY, May 25 (PIA) - - Gipasidan-an sa buhatan ni Executive
Secretary Paquito Ochoa Jr. ang publiko nga magbantay sa mga tawo’ng nagpakaarun-ingnon
nga sila mao ang kalihim ug dayun mangayo ug ayuda alang sa pampublikong
proyekto.
Kini ang pahimangno sa kalihim human nakadawat ang iyang buhatan ug
daghang reklamo kabahin sa mga tawo nga nagpato-o nga sila si Ochoa ug
nangayo’g mga pabor ug kwarta.
Sa miaging pipila ka buwan, nakadawat ug taho ang iyang buhatan nga
adunay mga tawo nga nagpa-ila nga sila mao ang executive secretary ug
nag-solicit ug mga pundo para sa mga proyekto sa kagamhanan o mitanyag nga
motabang kanila aron mapadali ang pag-proseso sa ilang mga papeles bugti sa
salapi nga ilang ibayad.
Ang himoon niining mga mangililad mao nga mo-text o tawag ngadto sa ilang
biktimahon nga ipasulod lang ang kwarta ngadto sa ilang mga personal nga bank
account.
Dugang ni Ochoa, ang uban usab nga mga opisyales sa kagamhanan ang
gi-impersonate usab sa mga mangililad.
Agig tubag ning maong suliran, mipahigayon na ang iyang buhatan ug usa ka
imbestigasyon uban sa panabang sa National Bureau of Investigation (NBI),
Philippine National Police (PNP), ug Criminal Investigation and Detection Group
(CIDG).
Nakita usab ni Ochoa nga kadtong mga tawo nga nadak-pan sa maong
pagpangilad mga sakop sa text scam syndicate.
Gi-awhag usab ni Ochoa ang katawhan nga itaho dayun sa buhatan sa Pangulo
nasud kon sila nakadawat ug mga text o tawag nga nangayo ug kwarta.
Mipasidaan usab si Ochoa nga kadtong masakpan nga naghimo sa ingon
pahamtangan ug tukmang silot sigun sa gimando sa balaod.
(FPG/PCOO/PIA-Zamboanga del Norte)
