ni Alfonso T. Ruda
DIPOLOG CITY, MAY 26(PIA)---Gipasalig sa Malakanyang nga
kaya niining wagtangon ang tanang benepisyaryo sa Pantawid Pamilyang Pilipino
Program (4Ps) gikan sa ligid sa kawad-on panahon sa administrasyong Aquino,
sumala pa sa usa ka opisyal sa Palasyo.
Ang
tigpamaba sa Palasyo nga si Edwin Lacierda, sa regular press briefing sa
Malakanyang nagkanayon nga ang administrasyon nagtoo nga ang Pantawid Pamilyang
Pilipino Program maoy usa ka lig-ong pundasyon para mapalambo ang kalidad sa
kinabuhi sa mga Filipino.
Ang
gobyerno naglugway na ug hinabang ngadto sa kapin sa tulo-ka-milyon hangtud
niadtong Marso karong tuiga, samtang gipadayon niini ang ekonomikanhon ug
katilingbanong reporma nga mahatagan ug alibyo ang kinabuhi sa kinabag-ang
kabus nga mga Filipino.
Ang
Pantawid Pamilyang Pilipino Program o Conditional Cash Transfer sa
administrasyong Aquino pinaagi sa Department of Social Welfare and Development
(DSWD) nagtumong nga mamenusan ang problema sa mga kabus nga pamilya taliwala
sa kalibutanong krisis nga nasinatian.
“Base
sa kasinatian sa Brazil ug Mexico, dugay nang nagtrabaho ang CCT ug matuod nga
kabus ang nakabenepisyo ug wala gipamolitika. Ug kana ang hinungdan kon nganong
duna kitay National Household Targeting System,” matod pa ni Lacierda.
Gawas
sa dakong pagsaka sa gidaghanon sa mga batang nagpa-enroll, ang programa
nakapalambo usab sa gidaghanon sa mga batang nahatagan ug imunisasyon ug
pre-natal care.
Nagkalain-laing
pagtoon nagpakita nga ang maong programa para sa mga kabus gilaumang makapadako
sa kita sa mga benepisyaryo ug 12.6 porsiento.
Samtang
ang kita sa mga benepisyaryong-pamilya mao gyud ang tinguha sa programa, ang
kinatibuk-ang katilingbanoing programa sa gobyerno mao usab ang pagsiguro nga
ang mga benepisyaryo magpabiling himsog, ma-alamon ug mabungahon.
Ang
programa gipalapdan sa gobyerno sa tinguhang maabot niini ang daghan pang mga
kabus nga pamilya sa tibuok nasod. (ATR/PCOO/PIA9-Zambo
Norte)
