By Alma L. Tingcang
PAGADIAN CITY, 23 May – Ang mga quarantine officials sa People’s
Republic of China (PROC) mitugot na nga mosulod ang mga saging gikan sa
Pilipinas diha sa ilang merkado tapos pag-imposar ug hugot nga lakang kalabot
sa mga produkto nga gikan sa atong nasod.
“Usa kini ka maayong balita. Malampuson
kita pagresolbar sa phytosanitary issue. Nadawat nato ang taho nga karong
adlawa, gitugotan ang 30-40 containers nga molusot didto sa China,” si Deputy
Presidential Spokesperson Abigail Valte namahayag sa usa ka press conference sa
Malacanang kagahapong adlawa.
Matod pa ni Valte nga sumala sa
gikasabotan, ang Department of Agriculture modouble-check sa mga saging nga
i-export una kini ibiyahe ug ang tugbang niini didto sa PROC mokuyog kanila sa
higayon nga modangat na didto ang mga exports.
“Ipailalom kini sa hiniusang
pag-inspeksiyon aron dali ang pagresolba sa phytosanitary issue,” si Valte
miingon.
Aron pagtabang sa mga local banana
producers nga naapektohan sa maong panghitabo tali sa Chinas, si Valte
mipahayag nga gimando na sa presidente ang usa ka pagtuon aron matabangan sila.
Bisan pa man nga haluag na ang import
restrictions nga gi-imposar sa China, ang kagamhanan padayon nga nangita ug
laing merkado alang sa saging gikan sa atong nasod.
Ang
kalihim sa Department of Agriculture nagmugna ug usa ka team gikan sa Bureau of
Plant Industry nga moadto sa China aron pagsuta sa na-stranded nga shipment sa saging isip tubag sa reklamo
sa China nga adunay peste ang mga saging gikan sa Pilipnas. Sa samang paagi,
gi-imbitar usab ang mga quarantine officials sa China nga mo-inspeksiyon sa mga
plantasyon ug mga pantalan sa atong nasod.
Ang
Pilipinas usa sa mga nag-unang exporters ug saging sa kalibotan diin kadaghanan
niining plantasyon anaa sa Mindanao. Ang nag-unang merkado naglakip sa Japan,
South Korea, PROC ug New Zealand. Niadtong tuig 2012, ang kinatibuk-ang kita sa
preskong Cavendish nga saging mikabat ug $720 milyon.
Ang
PROC maoy ikaduhang nag-unang export market alang sa saging, sunod sa Japan.
Sumala pa sa talaan niadtong Pebrero 2012, ang Philippine banana exports ngadto
sa China naglangkob sa 19 porsiyento sa kinatibuk-ang export sa unang duha ka
bulan ning kasamtangang tuig. (ALT-PCOO/PIA9-Zambo Sur)
