ni Alfonso T. Ruda
DIPOLOG CITY, APR. 17(PIA)---Gipahayag ni Presidente Benigno Aquino III nga gikonsidera karon sa gobyerno ang “pagprivatize” sa kasamtangangang mga planta sa enerhiya sa nasod sa tinguhang mahatagan ug kasulbaran ang sitwasyon sa enerhiya sa Mindanao, uban ang pag-awhag ug dugang “private investment” sa sektor sa enerhiya aron mahatag sa katawhan ang kuryente sa katawhan sa ubos nga presyo.
Sa usa ka press conference sa Malakanyang niadtong Lunes, gibutyag ni Presidente Aquino ang pagpaningkamot ug pagpabiling bukas sa gobyerno sa mga maayong hunahuna para sa katawhan aron masiguro ang kasulbaran sa problema sa enerhiya dinhi sa Mindanao.
“Kinahanglang madasig nato ang mga investors nga magpabarog niining maong matang sa planta,” matod pa sa Presidente.
“Sa akong pagpunta sa Mindanao, nangutana sila ug i-privatize ba nato ang Agus ug Pulangi(Power Plant) systems….basin diha gyud ni mosangko sa kadugayan,” matod pa niya.
Gihisgutan sa Hepe Ehikutibo ang mga bentaha sa pagprivatize sa mga planta sa enerhiya, nga matod pa niya maglakip sa pagpadako sa kapasidad sa supply sa kuryente nga kinahanglanon sa mga konsumante.
Gihatagan ug punto ni Presidente Aquino nga gilantaw karon sa gobyerno dili lang ang kasamtangang pasilidad sa enerhiya kundili hangtud na ang paggamit sa kinatibuk-ang potensyal sa paghatag ug supisyenteng supply sa kuryente aron matubag ang gikinahanglan sa naglambong ekonomiya sa Mindanao.
Sa gipahigayong Energy Summit didto sa dakbayan sa Davao niadtong Biyernes, personal nga gituki sa Presidente uban sa mga stakeholders ang mga possibling solusyon sa sitwasyon sa enerhiya sa Mindanao
Gibana-banang dili momenus sa 500 ka mga delegado ang mitambong sa maong kalihokan nga naghatag ug oportunidad sa mga stakeholders nga ipabati ang ilang nagkalain-laing isyo ug mga rekomendasyon.(ATR/PCOO/PIA9-Zambo Norte)
