ni Alfonso T. Ruda
DIPOLOG CITY, APR. 18(PIA)--- Giawhag karon ni Energy Secretary Jose Rene Almendras ang kooperasyon sa tanang hingtungdan aron makab-ot ang magmadaugong solusyon sa problema sa enerhiya sa Mindanao.
Matod pa ni Almendras, sa gipahigayong Energy Summit didto sa Dakbayan sa Davao niadtong miaging Biyernes, giplastar sa gobyerno ang panginahanglan sa kinatibuk-ang pagpaluyo sa tanang hingtungdan aron paghimo niining epektibo.
Pipila sa gisugyot sa Department of Energy mao ang pagbalhin sa power barges; tukmang pagkontrata sa mga hingtungdan uban sa mga power utility providers ug ang pagpaayo sa Agus ug Pulangi Hydropower Complex.
“Ang tanan nag-agad sa implementasyon ug nagkinahanglan usab sa hiniusang pagpaningkamot sa tanang hingtungdan aron magbunga kini ug maayong resulta,” matod pa ni Almendras.
Sa maong Energy Summit, gipahayag ni Allmendras nga ang pagpaningkamot kinihanglang dalion sanglit gipahayag man sa mga eksperto ang kausaban sa dagan sa pag-ulan dinhi sa Mindanao.
Sumala pa ni Almendras, ang Mindanao nagkuha sa dakong bahin sa panginahanglan sa kuryente gikan sa mga hydro-power plants nga nagsalig usab sa gidaghanon sa tubig nga dala sa ulan.
Kon irregular ang supply sa kuryente, posibli kitang makasinati ug kakulangan sa enerhiya dinhi sa rehiyon. Daghan kaayong posibling mahitabo kon magsalig lang gyud ta sa usa ka tinubdan sa enerhiya busa kinahanglang ato nang mapahimutang ang nagkalain=laing contingency plan alang niini, matod pa ni Almendras.
Mahinumdoman nga niadto pa, nagpasidaan na ang DOE nga kinahanglan nang ma-establisar dinhi sa Mindanao ang base load plants aron madugtongan ang kakulangan sa supply sa kuryente sa rehiyon. Unsa mang matang sa planta nga makahatag ug baseload power importante sanglit posible mang moubos ang water level sa maong planta sa panahon sa taas nga init kon hulaw.
“Bisan ug ato pang konsiderahon ang tipik sa kapasidad sa hydropower plant sa Mindanao, duna lang kitay 37.13 porsiento sa baseload nga ubos ra kayo kay sa atong gikinahanglan,” panapos pa ni Almendras.(ATR/PCOO/PIA9-Zambo Norte)
