ni Alfonso T. Ruda
DIPOLOG CITY, APR. 20(PIA)---Girpirmahan sayo niining semanaha ni Presidente Benigno Aquino III ang bag-ong balaod nga nagmugna ug dugang sangang regional trial courts sa Laguna sa tinguhang makuhaan ang na-backlog nga mga kaso sa mga hukmanan sa probinsiya ug mapadali ang pagpakanog sa hustisya, matod pa ni Executive Secretary Paquito Ochoa Jr.
Matod pa ni Ochoa, ang Akta Republika 10162 gipirmahan ni Presidente Aquino niadto Abril 17 aron amendahan ang Batas Pambansa Bilang 129 nga mas naila isip Judiciary Reorganization Act of 1980 ug matubag ang kakulangan sa mga regional trial courts sa Laguna nga maoy nakalangan sa pagpakanog sa hustisya.
Walay RTC sa Sta. Rosa, Laguna ug kadtong dunay mga kaso, kinahanglan pang mobiyahe ngadto sa silingang Biñan City ug sa lungsod sa Cabuyao aron motambong sa husay sa mga kasong criminal ug sibil.
Duna gyuy panginahanglan nga ma-establisar ang RTC sa Laguna , ilabi na sa Sta. Rosa City. aron malibre na sa pending nga kaso ang kasamtangang mga RTCs sa Laguna. Sa dili madugay, ang pagdugang ug duha ka sanga sa Laguna makapadali sa disposisyon sa mga kaso,” patin-aw pa ni Ochoa.
Ang RA10162 nagagikan sa Ubos Balay-Balaoranan ilalom sa House Bill no. 4488 nga nagtahas sa korte suprema nag mohatag ug numero sa bag-ong namugnang sanga sa RTC sa Fourth Judicial Region.
Gitahasan usab niini ang Chief Justice ug ang Kalihim sa Departamento sa Hustisya nga ilakip sa programa sa korte suprema ang pagpalihok sa dugang sanga sa RTC. Ilalom sa bag-ong balaod, ang pondo alang niini, ilakip na sa tinuig nga General Appropriations Act.
Ang RA 10162, mo-epekto 15 ka adlaw human nga makompleto ang iyang publikasyon sa Official Gazette o sa duha ka pamantalaan nga dunay heneral nga sirkulasyon.(ATR/PCOO/PIA9-Zambo Norte)
