Ni Alma L. Tingcang
PAGADIAN CITY, March 13 - - Gipasalig sa Malakanyang nga ang kagamhanang Aquino naningkamot pagpatuman ug mga lakang aron paghupay sa kabalaka sa transport sector pinaagi sa short-term ug long-term nga solusyon nga gi-implementar sa nagkalain-laing ahensiya sa gobyerno ug sa gipadayag nga pagpasalamat sa mga transport groups sa Pantawid Pasada Program (PPP).
Sa regular nga press briefing didto sa Malacanang kagahapon, si Presidential Spokesperson Edwin Lacierda miingon nga human sa gipahigayong panagtigom kauban ang mga transport groups, daghang mga isyu ang natubag na ug usa lamang ang pagtaas sa presyo sa lana sa daghang mga kabalaka sa maong grupo.
“Usa kini sa pagsubli sa among mga pahayag sa dihang nakigtagbo kita kanila ug mapamatud-an kini sa mga transport leaders…ang unang kabalaka dili kalabot sa price increase, gani nagpasalamat sila sa Pantawid Pasada Program nga gipatuman na,” si Lacierda nagkanayon.
Matod pa, adunay mga inisyatibo sa gobyerno aron pagsulbad sa problema kalabot sa “kotong cops” nga naglambigit sa mga personahe sa Philippine National Police nga nagmulta sa mga drivers sa public utility vehicles.
“Ang mga kabalaka sa transport leaders mao ang single ticketing, ang ‘kotong cops’ ug nagtuo ako nga nasulbad na ang tanan gawas na lamang niining ‘kotong cops’ nga atong gipangitaan ug kasulbaran karon,” matod pa ni Lacierda.
Siya miingon nga pagatun-an kini sa Department of Trade and Industry ug Department of Transportation and Communication ang posibleng diskwento alang sa transport operators pagpalit ug mga spare parts.
Labaw niini, adunay mga long-term nga programa nga naglakip sa paggamit ug renewable energy ug ubang alternatibong source sa enerhiya.
Ning bag-ohay pa lamang, ang Metropolitan Manila Development Authority (MMDA) ug ang 17 ka local nga kagamhanan sa Metro Manila milusad sa gitawag ug Uniform Ordinance Violation Receipts (UOVR) single ticketing system alang sa tibuok Metro.
Ang bag-ong traffic violation tickets nga nagdala sa logo sa MMDA, Land Transportation Office ug ang 17 ka LGUs sa Metro Manila gidisenyo aron mahimong tamper-proof ug adunay security features aron malikayan ang palsipikasyon.(ALT-PCOO/PIA9/ZamboSur)
