by Alfonso T. Ruda
DIPOLOG CITY, MAR. 12(PIA)---Tapuson na sa Philippine National Police ang gihimo niining imbestigasyon sa 1-ka bilyon ka pesos nga license card deal sa Marso 30 niining tuiga.
Gimanduan ni DILG Sec. Jessie Robredo si PNP Chief, Director-General Nicanor Bartolome, pagtapos sa imbestigasyon sa PNP Probe team sa license card deal sa Marso 30 ug pagpagawas ug resolusyon may kalabutan sa giingong ma-anomalosong kontrata tali sa PNP ug Nanjing Industrial Tools and Equipment para sa pag-imprinta sa license cards sa mga nanag-iya ug armas ug mga security guards sa tag 150 pesos matag usa.
Base sa computation sa legal office sa DILG, nag-imprinta ang Nanjing ug average nga 21,818 ka mga cards matag bulan para sa Firearms and Explosives Division (FED) sa PNP ug 20,245 para sa Supervisory Office sa PNP para sa mga Security Agencies. Kini nagkahulugan nga sulod sa 15 ka tuig ug sa tag 150 pesos matag card, ang kontrata mokantidad ug kapin kon kulang, 1.1357 bilyones ka pesos.
Ang maong kontrata gipirmahan niadtong Marso 2010 tali sa PNP nga gipanguluhan niadtong panahona ni Heneral Jesus Verzosa ug PNP Director for Logistics Luizo Ticman ug Romeo Macapinlac, ang Presidente sa Nanjing nga dunay buhatan sa Bonifacio Global City sa dakbayan sa Taguig.
Matod pa ni Robredo, ang isyo iyang gidala sa atensiyon ni Gen. Bartolome niadtong Nobyembre 2011 atol sa gipahigayong pagdungog sa Senado sa pahat sa PNP human gikuwestiyon ni Senador Panfilo Lacson ang 150 pesos nga lisensiya nga direktang gibayad ngadto sa Nanjing nga wala moagi sa naandang pamaagi sa pagbayad sa gobyerno. Sa wala pa ang 2009, ang pagbayad gipaagi sa payment order ug gipadala ngadto sa Land Bank.
Sa tubag sa memo ni Sec. Robredo niadtong Enero 4, 2012”, si Bartolome nagkanayon nga gimugna na sa iyang buhatan ang Technical Working Group (TWG) nga panguluhan ni Acting FED Chief Sr. Supt. Raul Petrasanta pagrepaso sa PNP Memo of Agreement (MOA) uban sa Nanjing ug paghimo ug tukmang rekomendasyon kabahin niini.
Ang kasabutan sa PNP uban sa Nanjing wala mahasubay sa procurement laws ug pamaagi, sumala sa nabutang sa MOA, kini nalapas.
Sumala pa sa legal office sa DILG, ang pagpalit Ilalom sa Akta Republika 9184, way pagsapayan sa gigikanan sa pondo, lokal man o gikan sa gawas, sa tanang mga sanga ug mga departamento sa gobyerno kinahanglang ipaagi sa competitive bidding.
Sumala sa resulta sa pasiunang imbestigasyon, walay gipahigayong competitive bidding sa pagpili sa Nanjing, lakip na ang makalibog nga bahin sa kontrata nga naghatag ug pagtugot sa Nanjing nga kuhaon ug balik ang tanang materyales ug ekipos sa higayong dili mahinayon o makansela ang proyekto sa di-pa kini mahuman.
“Dugay na akong nangayog pagpatin-aw gikan sa PNP nga mohatag ug progress report sa ilang pagrepaso sa MOA sa PNP ug Nanjing, ug akong nasabtan nga nangayo ug legal nga opinyon ang PNP FED TWG sa PNP legal service ug sa PNP Director for Comptrollership apan napakyas ang duha ka buhatan paghimo ug aksyon sa tukmang panahon kabahin sa maong isyo.(ATR/PCOO,PIA9-Zambo Norte)
