Ni Alma L. Tingcang
PAGADIAN CITY, March 15 - - Ang Malacanang mipahayag nga dili kini mosuporta sa plano nga pagpahamtang sa death penalty sa nasod bisan pa sa mga insidente sa mabangis nga krimen nga gihimo batok sa mga kababayen-an ug kabataan.
Adunay mga grupo nga naghangyo sa gobyerno nga ibalik ang silot nga death penalty tungod sa mga kasong rape sa mga kabataan nga gihimo sa mga kabatan-onan o kaha duol nga paryente.
“Kalabot sa death penalty, ang among posisyon mao nga dili kami mouyon sa pag-imposar sa death penalty. Tungod sa kasamtangang huyang nga sistema sa hustisya sa atong nasod, adunay posibilidad nga kung ipatuman nato ang death penalty, basin masilotan ang walay sala ug mapahamtangan sa death penalty,” si Presidential Spokesperson Edwin Lacierda nagkanayon sa press briefing didto sa Malacanang kagahapon.
Gisubli ni Lacierda nga mao usab kini ang baroganan ni Presidente Benigno S. Aquino III sa iyang pagkandidato pagka presidente niadtong tuig 2010.
Samtang miangkon si Lacierda nga angay kabalak-an ang mga kaso sa rape, sa kinatibuk-an, namenosan ang mga insidente sa krimen base sa statistics sa kapolisan.
Base sa mga indicators gikan sa Philippine National Police (PNP), mikunhod ang mga krimen ug sumala pa adunay 24 porsiyento nga pag-ubos sa crime rate sa 2011 kung ikumpara sa 2010.
| “Gihingusgan ug gipalambo sa PNP ang crime prevention mao nga mikunhod ang mga insidente sa kriminalidad,” matod niya. Si Lacierda miingon usab nga ang mga barangay kinahanglan motabang sa pagsumpo sa krimen aron walay mahitabo nga susamang insidente sa ilang mga dapit. Kalabot usab sa kabalaka sa Filipino-Chinese nga mga negosyante kinsa mitaho nga mitaas ang insidente sa kidnapping sa nasod, ang presidential spokesman miingon nga ipadayag nila ang maong isyu sa mga opisyal sa kapolisan. Hinuon, bisan pa man sa maong mga taho, si Lacierda miingon nga ang sitwasyon sa kahusay ug kalinaw sa nasod nagpabiling kontrolado ug ang mga mamuhunan nagpadayon pagbubo sa ilang salapi alang sa ilang mga negosyo dinhi sa Pilipinas. (ALT-PIA9/Zambo Sur) |
