ni Claro A. Lanipa
Pagadian City, Mar. 13 (PIA) – Ang Department of Interior and Local Government (DILG) nagdumili sa pagbutang sa mga litrato ug ngalan sa mga opisyales lokal sa mga posters ug streamers, ilabi na sa pahibalo sa mga kalihukan nga may kalimbigitan sa Pantawid Pamilyang Pilipino Program (4Ps).
Gipagawas ni DILG Secretary Jesse Robredo and usa ka direktiba ngadto sa mga provincial governors, city ug municipal mayors ubos sa rekomendasyon sa National Advisory Committee sa Pantawid Pamilyang Pilipino program, nga gilangkoban sa nagkalian-laing mga ahensiya sa kagamhanan nga gipangulohan sa Department of Social Welfare and Development (DSWD).
Sa rekomendasyon ngadto sa DILG, ang advisory committee nagkanayon nga sa ilang na-obserbahan mga litrato ug ngalan sa mga opisyales lokal ang nakit-an gipasundayag sa mga streamers ug posters sa 4Ps nga maoy centerpiece nga programa sa nasudnong kagamhanan sa pagpakunhod sa kawad-on.
Ang Pantawid Pamilyang Pilipino Program (4Ps), giila usab isip Conditional Cash Trasfer Program (CCT) nga gi-implementar sa DSWD, gitumong sa paghupay sa kahimtang sa kinabuhi sa mga pobreng Pilipino pinaagi sa paghatag kanila cash grants sa P1,400 matag pamilyang kabus kinsa adunay mga anak 14 anyos pa ubos. Ingon niana obligasyon usab sa matag benepisyaryo aron sa pagpadala sa ilang mga anak ngadto sa eskuwelahan, ug ang mga inahan mopahigayon sa regular pre-natal o post-natal care.
Sayo pa niini, ang DILG, DSWD ug ang DOH miuyon sa pagduso sa hiniusang programa ug proyekto alang sa mga kabus nga LGUs nga giila pinaagi sa National Household Targeting System (NHTS) sama sa 4Ps, ang programang Kalusugang Pangkalahatan Community Health Mobilization Program ug ang programa sa DILG, Water for the Waterless LGUs.
Matod pa ni Robredo ang maong hiniusang istratehiya gitumong aron sa pagpasayon sa implementasyon sa mga program sa pagpakunhod sa kawad-on, ug mahatagan ug katarungan ang pondo sa nasudnong kagamhanan.
“Giila usab nato ang suporta ug kooperasyon sa atong mga kagamhanang lokal diha sa implementasyon sa mga pro-poor programs ngadto sa mga benepisyaryo sa NHTS,” miingon si Robredo.
Sa tuig 2012, ang DILG mipagawas sa susamang direktiba, nga nagdumili sa pagbutang sa mga ngalan ug litrato sa mga opisyales sa mga billboards o karatula sa mga program ug proyekto sa kagamhanan, lakip sa mga firetrucks, ambulansya ug sakyanan sa pulis. (DIL/PIA9/CAL)
