ni Alfonso T. Ruda
DIPOLOG CITY, FEB. 29(PIA)--- Subling gibuhi sa Philippine National Police ang adhoc special police units aron mag-imbestigar ug magpahigayon ug operasyon batok sa naghitak nga illegal nga sugal sa nasod.
Kini human giisyo ni PNP Chief, Director-General Nicanor Bartolome ang Letter of Instruction No. 05/2012 nga nagbuhi ug balik sa PNP Anti-Illegal Gambling Special Operations Task Force sa nasudnon, rehiyonal ug probinsyal nga level.
Ang AIG-SOTF sa nasudnon, rehiyonal ug probinsiyal nga level, mao ang responsable sa pagpatuman sa balaod batok sa mga illegal numbers game, partikularmente ang jueteng ilalom sa Presidential Decree No. 11602 nga na-amendahan sa Akta Republika 9287.
Ang AIG-SOTF mao usab ang responsable sa pagprodyus ug pag-analisar sa nakalap nga mga kasayuran may kalabutan sa illegal nga sugal, lakip na ang aktibong counter-intelligence ug imbestigasyon aron pag-ila sa mga personahe sa PNP ug mga opisyales ug mga empleyado sa gobyerno nga nalambigit sa illegal nga sugal.
Alayon niini, gitudlo ni Bartolome si Deputy Director-General Emil Sarmiento, PNP Deputy Chief for Operations isip Commander sa nasudnong PNP AIG-SOTF, uban kang Police Director Samuel Diciano, PNP Director for Investigation and Detective Management isip Deputy Task Force Commander.
Maghatag ug dugang unod sa Task Force mao ang matudlong teams gikan sa Criminal Investigation and Detection Group(CIDG); Intelligence Group(IG); ug Special Action Force (SAF).
Ngadto na sa rehiyonal ug probinsyal nga level ang Regional Director ug Provincial Director maoy mangulo sa tagsa-tagsa ka AIG-SOTF sa ilang lugar nga pagalangkuban sa local police intelligence units, mobile groups ug CIDG.
Ang direktiba ni Bartolome naghatag ug gibug-aton sa “One-Strike Policy” ngadto sa mga Hepe sa Kapulisan nga nagpasagad sa ilang katungdanan sa pagsumpo sa illegal nga sugal sa ilang mga lugar nga nasakupan.
Ilalom sa One-Strike-Policy, ang unsa mang malampusong operasyon sa AIG-SOTF batok sa illegal nga sugal magresulta sa pagkalagpot sa Hepe sa Pulis sa usa ka lungsod o Precinct Commander.
Ang Hepe sa Pulis sa usa ka siyudad ma-relieve usab sa iyang puwesto kon duha sa iyang mga Police Community Precinct Commanders napalagpot usab sa puwesto gumikan sa susamang katarungan.
Ang pagka-relieve sa tulo ka mga Hepe sa Pulis sa us aka probinsiya o chartered city, ilalom sa One-Strike Policy magresulta usab sa pagkalagpot sa Provincial o City Director.
Sa hataas nga ang-ang sa kamanduan, ang Regional Director matangtang usab sa iyang puwesto kon duha ka Provincial o City Directors ang napalagpot usab sa serbisyo gumikan sa mao gihapong katarungan.(PCOO/ATR/PIA9-Zambo Norte)
