By Alma L. Tingcang
PAGADIAN CITY, February 21 (PIA) - - Gimandoan ni Presidente Benigno Aquino III ang Department of Energy (DOE) sa pag-reload ug P1,200 ngadto sa account sa matag usa ka Pantawid Pasada card holder aron pagsangga sa impact sa nagkataas nga presyo sa lana.
“Gimandoan na ni Presidente Aquino ang DOE nga mohatag ug P1,200 reload alang sa 100,000 benepisyaryo sa Pantawid Pasada Program. Alang kini pagpakunhod sa epekto sa nagkataas nga presyo sa lana nga nahitabo kagabii,” si Presidential Spokesperson Edwin Lacierda miingon atol sa usa ka press briefing sa Malacanang kagahapong adlawa.
Ang Pantawid Pasada Program sa kagamhanan gimugna aron paghatag ug subsidy ngadto sa public transport sector tungod sa pagtaas sa presyo sa mga produktong petrolyo.
Si Lacierda miingon nga ang DOE magsugod pag-apud-apod sa mga cards ngadto sa mga drivers sa public utility vehicles (PUV) kinsa mga benepisyaryo sa Pantawid Pasada Program.
Dugang niini, siya miingon nga ang mga benepisyaryo makaangkon o maka-avail usab ug mga diskwento sa pagpalit ug ligid, baterya ug uban pang spare parts.
Sa tabang usab sa Office of Transport Cooperatives ubos sa Department of Transportation and Communications (DOTC) ug sa Philippine International Trading Corporation ubos sa Department of Trade and Industry, gipalig-on niini ang pagtambayayong tali sa kooperatiba ug mga manufacturers sa ligid, baterya ug uban pang mga spare parts,” si Lacierda miingon.
Ang gobyerno nagsugod usab pag-implementar sa mga lakang aron pagkunhod sa presyo sa ligid, baterya ug mga spare parts aron matabangan ang transport sector.
“Pwede makakuha ug tax exemption ang mga kooperatiba, gawas pa sa dealer’s discount, direkta niining mapabarato ang gastohon alang sa maintenance sa mga sakyanan niadtong mga operator ug driver sa mga jeep, AUV ug taxi. Ugma dayon mag-atubang ang mga kooperatiba ug manufacturers aron masugdan pag-order and mga kagamitan,” matod ni Lacierda.
“Nagmahal ang presyo sa lanan tungod kay kusog usab ang pag-angkat sa mga nasod sa Europa, diin adunay wala damha nga pagtugnaw niining mga panahona. Wala usab nakatabang ang tensiyon didto sa Iran ug pipila ka nasod sa Kasadpan,” siya miingon.
Gipasalig ni Lacierda nga ang kagamhanang Aquino magpadayon pagmugna ug mga lakang aron paghupay sa gisagubang karon sa transport sector. (ALT-PIA9/Zambo Sur)
