ni Claro A. Lanipa
Pagadian City, Feb. 21 (PIA) – Isip usa ka epektibong lakang pagsanta sa pagbaha ilabi na sa mga ubos nga dapit, si Interior and Local Government Secretary Jesse Robredo nanawagan sa tanang hepe ehekutibong lokal sa pag-apil sa ilang development plans o climate change action plan ang pagtukod sa rainwater collectors.
Si Robredo miingon ang pag-instalar sa rainwater collectors ug rainwater collection systems (RWCS) gitanyag ubos sa Republic Act 6716 kon ang “Rainwater Collector and Springs Development Law” nga nagtuboy sa RWCS isip usa ka mekanismo aron moaghat sa pagkonserbar sa tubig ug pagpugong sa pagbaha.
Matod pa niya ang rainwater collection systems nagtanyag sa simple ug epektibong pamaagi sa pagpreserbar ug tubig, pagpakunhod sa pagbaha, motanyag sa gitawag water buffer ug recharge aquifers. Kining (rainwater collectors) mapuslanon panahon sa ting-ulan ug ting-init, tungod kay dili lang kini mopakunhod sa hapak sa pagbaha sa atong katawhan, apan mosilbi usab isip dugang tinubdan sa tubig panahaon sa ting-init.”
Sa iyang direktiba ngadto sa mga provincial governors, city ug municipal mayors ug punong barangays, si Robredo mihagit kanila sa pag-apil sa pagtuboy sa teknolohiya sa RWCS nga mahimo kining gamiton sa mga komunidad, ug pag-instalar sa RWCS sa LGU infrastructure, kon kini tukma sa maong lugar.
“Mosilbi usab kini isip modelo sa pagdani sa mga panimalay sa mga komunidad aron sa pagsagop sa RWCS sa gagmay’ng pamaagi,” miingon siya.
Uban sa mga nasudnong ahenisya nga naglambigit sa implementasyon sa mga programa sa water and sanitation ug isip miyembro sa Advisory Board to the Climate Change Commission, ang DPWH ug DILG sayo pa niini mipirma sa memorandum of agreement aron sa pagpadayag sa ilang pasalig aron sa pagtuboy ug pagduso sa implementasyon sa rainwater collection facilities subay sa tuyo ug tumong sa RA 6716.
Dugtong pa sa maong direktiba, gimandoan ni Robredo ang tanan DILG regional directors aron sa pagmugna sa implementasyon ug sa pagpasundayag ang RWCS sa ilang kaugalingon buhatan ug ipakaylap ang direktiba ngadto sa uban.
Gipahimangnoan usab niya ang tanan hepe ehekutibong lokal ug ang buhatan rehiyonal sa DILG aron pagngayoon ug tabang gikan sa DPWH district office alang sa konstruksyon sa RWCS gamit ang DPWH prototype designs. (DILG/PIA9/CAL)
