ni Alfonso T. Ruda
DIPOLOG CITY, FEB. 21 (PIA)---Gi-aprobahan na sa Kalihim sa Department of Budget and Management nga si Florencio “Butch” Abad ang pagpagawas sa 3.8 bilyones ka pesos nga pondo sa Department of Public Works and Highways para sa routine repair and maintenance sa mga nasudnong kadalanan ug tulay sa nasod, nga labi pang nagpalig-on sa commitment sa administrasyong Aquino nga ma-improve ug mapaayo ang mga nasudnong dalan.
“Ang road maintenance program mao ang usa sa mga paagi nga mapreserbar sa kagamhanan ang nasudnong kadalanan. Sa pagsiguro nga napaayo ug namintinar ang atong kadalanan, wala lang nato hatagi ug kasayon ang atong mga ka-igsoonan sa ilang pagbiyahe kundili ato usab nga gihatagan ug dalan ang malungtaron ug makanunayong paglambo sa atong ekonomiya,” matod pa ni Abad.
Ang ipagawas nga pondo milangkob sa 95 porsiento sa 4-bilyones ka pesos nga alokasyon sa DPWH para sa routine maintenance activities, nga kasamtangang sakop sa Akta Republika 10155 sa 2012 General Appropriations Act.
Sa 3.8 bilyones ka pesos nga pondo, 74 porsiento kon 3 bilyones ka pesos niini ang gamiton para sa pagmintinar sa mga carriageways sa mga nasudnong kadalanan ug tulay aron mapreserbar ang integridad sa istraktura ug kapuslanan niini. Partikular sa mga kalihokang gamitan sa pondo, ang pavement maintenance, regravelling, road drainage system ug structure maintenance.
Samtang sa laing bahin, ang 630.2 milyones ka peos kon 16 porsiento sa gipagawas nga pondo gamiton usab sa roadside activities sama sa roadside upkeep activities, sama sa pagmintinar sa abaga sa kalsada, drainage system sa kalsada ug serbisyo sa trapiko.
Ang nahibiling 5 porsiento kon 200 milyones sa kinatibuk-ang ipagawas nga pondo pagatratahon isip emergency fund para sa daling pagpabarog ug balik sa kondisyon sa kadalanan ug mga istraktura sa kadalanan nga na-apektahan sa kalamidad.
Kini, gawas pa sa 550 milyones ka pesos nga Quick Release Funds for Disaster Related Rehabilitation Projects nga napagawas na sa DBM ngadto sa DPWH.
Ang 4 bilyones ka pesos nga pondo, diin gikuha ang 3.8 bilyones ka pesos, maoy tipik sa 7.3 bilyones ka pesos nga alokasyon sa DPWH para sa routine maintenance sa kasamtangang mga kadalanan sa nasod. Tuyo sa ahensiya nga mapreserbar ang 31,230 ka kilometrong dalan sa nasod pagkatapos niining tuig 2012.
Matod pa ni Abad, ang ipagawas nga pondo idugang sa pagpaningkamot sa DPWH aron mapabarog ang mga inprastaktura ug public construction activity sa 2012. Sayo niini, gikataho nga 59 porsiento sa mga programa karong tuiga napa bid-out na ug na-award na sa tunga-tunga pa niining bulana.
Gikonpirmar usab sa DPWH ang construction initiative nga mapadali ang trabaho , diin gilaumang masugdan na ug trabaho karong bulana.
Ang go-sginal mo-apply sa 228 ka mga proyekto nga nagkantidad ug gikan sa 50 ngadto sa 150 milyones ka pesos, samtang laing hut-ong sa proyekto nga nagkantidad ug kapin sa 150 milyones ka pesos maglihok na sa katapusan sa bulan sa Marso.(ATR/PIA9-Zambo Norte)
