ni Alfonso T. Ruda
DIPOLOG CITY, FEB. 29(PIA)--- Si Presidente Benigno Aquino III mipasalig nga hatagan na ug kasulbaran sa gobyerno ang problema sa kakulangan sa lawak-saringan sunod tuig.
Ang pasalig giluwatan sa Pamuno Nasod atubangan sa mga partisipantes sa 4th National Congress of the Coordinating Council of Private Educational Associations.
Matod pa ni Presidente Aquino nga kining tanan posibling mahitabo pinaagi sa mga reporma nga ipatuman sa kinatibuk-ang bureaucracy ug investment programs sama sa Public-Private Partnership Program.
Sumala pa sa Pangulo, dihang milingkod siya isi Pamuno Nasod sa Pilipinas, mitaho ang Department of Education nga duna silay kulang nga 66,800 ka mga lawak-saringan para gamiton sa mga magtutungha.
Sukad niadto, padayong napaubsan sa DepEd ang kakulangan sa mga lawak-saringan pinaagi sa pagpabarog ug 15 mil ka mga lawak-saringan niadtong 2011 ug laing 35 mil ang nakatakdang ipabarog usab karong tuiga.
Kompiyansa ang DepEd nga masulbad nila kining maong problema sunod tuig.
“Sa ato pa, sa tuig 2013, duna pay dugang 15 mil ka mga lawak-saringan ang magikan sa Public-Private Partnership Program plus uban pang donasyon gikan sa laing tinubdan, nga makapapas sa 66,800 nga kakulangan sa lawak-saringan sa ikatulo ka tuig sa atong administrasyon,” matod pa ni Presidente Aquino.(PNA/ATR/PIA9-Zambo Norte)
