ni Alfonso T. Ruda
DIPOLOG CITY, FEB.10(PIA)---Gumikan sa sunud-sunod nga dagkong trahedyang nahiagoman sa nasod, nanawagan karon si DILG Secretary Jesse Robredo ang tanang mga Local Community Executives nga magpahigayon ug disaster awareness and disaster response campaign sa ilang tagsa-tagsa ka komunidad.
Ang panawagan gipalanog ni DILG Sec. Jesse Robredo atol sa gipahigayong ikaduhang General Assembly ug National Executive Board meeting sa Liga ng mga barangay sa Manila kagahapon(Pebrero 9,2012).
Ang nasangpit nga asembliya gisalmotan sa kapin sa 5 ka libo ka mga Chapter Presidents sa Liga ng mga Barangay gikan sa provincial ug Highly-Urbanized Cities sa nasod.
Sa iyang pagpakigpulong, gi-awhag ni Robredo ang mga Barangay Chairmen nga kanunayng mangandam sa ilang disaster risk reduction and management plans nga naglakip sa pagpabakwet sa mga residente, kon gikinahanglan.
Gi-awhag usab sa Kalihim ang mga opisyales sa barangay nga sundon ang disaster protocols, magpahimutang ug early warning systems, ingon man magpahigayon ug regular nga pagbansay-bansay alang sa pagpangandam sa ilang mg katagi-balangay sa unsa mang di-maayong epekto sa kalamidad.
Sa samang higayon, gidasig ni Robredo ang mga opisyales sa barangay nga magtukod ug emergency group responders ug community service brigades nga molugway ug hinanaling hinabang sa mga biktima sa kalamidad.
Matod pa Robredo, panahon sa kalamidad, kinahanglang buksan sa mga opisyales sa barangay ang ilang linya sa komunikasyon alang sa daling koordinasyon sa tag-as nga mga otoridad, volunteer groups, ug uban pang hingtungdang hahensiya sa kagamhanan aron pagsiguro nga makaabot sa tukmang panahon ang gikinahanglang mga hinabang.
Sa iyang bahin, malipayon usab nga gidawat ni Barangay Bago Bantay (Quezon City) Executive Officer Benjamin Pabustan ang sugyot ni Robredo nga paglambigit sa mga Hepe Ehikutibo lokal sa nasangpit nga plano.(ATR/PIA09-Zambo Norte)
