ni Claro A. Lanipa
Pagadian City, Feb. 10 (PIA) –Ang Department of Public Works and Highways (DPWH) ning bag-o lang naghiusa sa puwersa uban sa Department of Tourism (DOT) ug Research Education and Institutional Development (REID) Foundation, Inc., usa ka non-government organization, pinaagi sa pagpirma sa memorandum of agreement nga naglangkob sa paghiusa sa mga plano ug programa isip suporta sa tourism infrastructure development program sa kagamhanan ubos sa mando sa RA 9593 kon ang Tourism Act of 2009.
Si Sec. Rogelio Singson miingon nga ang DPWH, DOT ug REID nagmugna sa hingpit nga panagsangga sa pag-ila, pag-tantiya, paghatag ug unang pagtagad ug sa pag-implementar sa tourism infrastructure sa mga nahaunang mga destinasyon sa turismo dinhi sa Pilipinas isip suporta sa tumong ug mga gipunting sa National Tourism Development Plan (NTDP) ug sa Philippine Development Plan (PDP).
Kabahin sa pasalig sa DPWH mao sa pagpalambo sa Tourism Road Infrastructure Project Prioritization Criteria (TRIPC), mosilbi kini isip mekanismo sa implementasyon sa RA 9593; pag-andam sa multi-year program, pagduso sa mga estimates, ug tinuig tourism road infrastructure program, miingon si Singson.
Dugtong ni DPWH Assistant Secretary for Planning Maria Catalina Cabral, nga ang ilang ahensiya mipasalig nga motampo sa natad sa transport infrastructure development nga nagdala sa importanteng papel sa pagpalambo sa turismo aron sa pagdani ug mga bisita ngadto sa mga destinasyon sa turismo.
Samtang ang DOT maoy moduso sa TRIPC subay sa importansya sa destinasyon sa turismo ug ang kinahanglanon sa dalan sa turismo sa giila sa NTDP ug sunod niana mokonsulta ug mohimo’g kasabutan sa DPWH mahitungod sa pagsagup ug implementasyon sa programa.
Ang REID mao ang secretariat sa Technical Working Group (TWG), ug mipasalig usab tali sa uban, nga motabang sa DOT ug DPWH sa pagsusi, pilot test, pagsagup ug pag-implementar sa TRIPC, lakip ang paghimo sa multi-year ug tinuig TRIP; ug pag-organize sa training program aron sa pag-edukar ug paghatag kasarang sa TWG ug mga stakeholders. Ang memorandum of agreement mi-epekto niadtong Enero 20, 2012 ug mahimong bag’ohon matag tuig hangtod sa 2016. (DPWH/ PIA9/CAL)
