ni Alfonso T. Ruda
DIPOLOG CITY, FEB. 28(PIA)--- Sanglit katungod man sa publiko nga maka-angkon ug responsable ug nagtrabahong mga lokal nga opisyal, nagpasidan-an karon sii Interior and Local Government Secretary Jesse Robredo sa tanang Lokal nga mga Hepe Ehikutibo batok sa kanunayng dili pagpakita sa ilang buhatan ug pagpasagad sa ilang katungdanan.
Matod pa ni Robredo, padayon siyang nakadawat ug taho may kalabutan sa kanunayng pag-absent sa pipila ka mga Local Chief Executives nga sukwahi kay sa gitakda sa balaod ug naka-apektar sa ilang mga katagi-lungsod ug sa ilang serbisyo sa katawhan, sa kinatibuk-an.
“Dunay mga opisyal nga kon dili man absent, tua kini nag-opisina sa laing lugar gawas sa opisyal nga lugar kon diin adto sila dapat nag-opisina,” matod pa ni Robredo.
Ilalom sa Local Government Code of 1991, ang Gobernador o Mayor gikonsiderang absent kon wala siya sa iyang lugar nga trabahoanan o tua siya sa gawas sa iyang hurisdiksyon sulod sa 10 ka mga adlaw.
Gipahinumdoman ni Robredo ang mga Hepe Ehikutibo Lokal nga isip nga piniling lider sa katawhan, gilauman silang mohatag ug kinatibuk-ang pagserbisyo ug paggahin ug panahon ug atensiyon ug pagtuman sa ilang opisyal nga katungdanan ug likayan ang pagpraktis sa propisyon o unsa mang gimbuhaton gawas sa ilang katungdanan.
Partikular nga gitumbok sa Kalihim sa DILG ang Section 90 sa Local Government Code nga nagkanayon,” Ang tanang Gobernador, mga Mayor sa kalungsuran ug mga dakbayan gidid-an sa pagpraktis sa ilang propisyon ug paghimo sa unsa mang gimbuhaton gawas sa iyang katungdanan isip Hepe Ehikutibo Lokal.”
Sa iyang direktiba, partikular nga gimanduan ni Robredo ang mga gobernador nga magbutang ug monitoring mechanism aron makakuha ug impormasyon sa presensiya sa mga Hepe Ehikutibo-Lokal sa ilang opisyal nga istasyon ug kadtong mga opisyal nga kanunayng wala sa ilang buhatan.
Niadtong miaging tuig, nagpagawas usab ang DILG ug Memorandum Circular nga klarong nagtakda sa silot nga ipahamtang sa mga badlongong piniling opisyal subay sa gilatid sa Section 60 sa Local Government Code of 1991.
Subay sa maong memo, ang usa ka opsisyal mahimong suspendihon o palagpoton sa serbisyo gumikan sa dishonesty, oppression, misconduct in office, gross negligence o derelicton of duty, o walay pagtugot n ga pag-absent sa buhatan sulod sa 15 ka adlaw.
Subay sa Administrative Order No. 267, series of 1992, ang general supervision---direkta ilalom sa probinsiya ug mga highly-urbanized cities ug independent component cities pinaagi sa probinsiya may kalabutan sa component cities ug mga munisipalidad ; ug pinaagi sa siyudad ug lungsod kabahin na sa barangay subay sa gitakda sa Section 25 sa Local government Code ang gitugyan na sa Kalihim sa Interior and Local Government.(ATR/PIA9-Zambo Norte)
