ni Alfonso T. Ruda
DIPOLOG CITY, FEB. 28(PIA)--- Sa tinguhang mapahapsay ang serbisyo sa maayong panglawas sa nasod, nagpagawas bag-ohay pa lamang ang Department of Budget and Management ug 306.6 milyones ka pesos ngadto sa Department of Health aron gamiton sa implementasyon sa Health Facilities Enhancement Program (HFEP).
Ang kinatibuk-ang napagawas nga pondo nga kuhaon gikan sa Continuing Appropriations ilalom sa 2011 National Budget, maoy gamiton pag-upgrade sa nagkalain-laing tambalanan sa gobyerno ug mga rural health units sa tibuok nasod.
“Kining maong release nahasubay sa tinguha ni Presidente Benigno Aquino III nga ma-preserbar ang panglawas ug pagkatawo sa mga Filipino. Sa pag-improve sa mga tambalanan sa gobyerno ug mga rural health centers, mahimo namong itunol ang healthcare services ug ihatag ang hataas nga kalidad sa medical treatment sa mga tawong labawng nanginahanglan niini,” matod pa ni Budget Secretary Florencio “Butch” Abad.
Sa napagawas nga pondo, 182.7 milyones ka pesos ang gamiton para sa building ug structure outlay, samtang gilain usab ang 123.9 milyones ka pesos para sa mga gastos may kalabutan sa mga makinarya ug ekipos sa tambalanan.
Ang HEEP gimugna aron mapalig-on ang healthcare services sa mga tambalanan ug regional health centers, partikularmente sa obstetric ug newborn health services. Ang programa maghatag usab ug kahigayonan sa mga tambalanan sa gobyerno nga matubag ang mga healthcare benchmarks, lakip na ang para sa disaster safety, DOH licensing, ug development standards para sa quality care.
Ang HEEP nagtumong usab nga palapdan ang serbisyo ngadto sa mga island province hospitals, ug sa mga teaching ug training hospitals, ingon man pag-upgrade sa mga piniling DOH medical centers ug regional hospitals para sa specialty ug subspecialty services.
Ang programa dunay kinatibuk-ang nakaprogramang lokasyon nga 7.14 bilyones ka pesos ilalom sa 2011 budget, diin 6.87 bilyones ka pesos niini ang napagawas na.
“Ang bag-ong narelease nga pondo para sa HFEP maoy kamatuoran sa commitment ni Presidente Benigno Aquino III sa Millenium Development Goals, partikularmente ang improving maternal healthcare sa tibuok nasod . Pinaagi sa napagawas nga pondo, naglaum kaming mapalig-on ang infrastructure ug equipment components sa paghatag ug tabang-medikal alang sa maayong pagtubag sa panginahanglan ang mga pasyente sa mga public health facilities,” matod pa ni Abad. (PCOO/ATR/PIA9-Zambo Norte)
