ni Alfonso T. Ruda
DIPOLOG CITY, FEB. 23(PIA)---Gilusad karon sa Philippine National Police (PNP) ang bag-ong anti-kidnapping force nga makiggubat batok sa pagpangdagit nga nahitabo sa nasod, ilabi na dinhi sa Mindanao.
Sumala pa sa Hepe sa PNP nga si Director-General Nicanor Bartolome, ang Anti-Kidnapping Group (AKG) maoy ipuli sa Police Anti-Crime Emergency Response (PACER) nga nabungkag gumikan sa resolusyon nga na-aprobahan sa National Police Commission.
Matod pa ni Bartolome, ang PNP-AKG, nga mahimo nang regular PNP national operating unit, panguluhan sa kanhing Hepe sa PACER nga si Senior Superintendent Isagani Nerez, usa ka abogado nga membro sa Philippine Military Academy Class 1984.
Gihulagway sa liderato sa PNP ang PNP-AKG nga mahimong usa ka highly-capable unit nga ubanan sa maayong pagkabansay ug kompleto sa gamit nga mga negosyador, imbestigador, crisis managers ug mga tactical officers pag-abot sa tuig 2030.
Naglaum si Bartolome nga magmalampuson ang PNP-AKG sa kampanya batok sa kidnapping ug paggunit sa hostage negotiations.
Mahinumdoman nga ang PACER gimugna niadtong Hulyo 27, 2002 taliwala sa sunod-sunod nga mga pagpangdagit nga nahitabo dinhi sa nasod.
“Uban ang mas daghang personahe, ang PNP-AKG mahimo paghatod ug daghang kalampusan batok sa pagpangdagit nga binuhatan sa mga organisadong crime and terrorist groups,” matod pa ni Batolome.
Matod pa ni Bartolome, ang AKG mao ang nag-unang grupo sa PNP nga mogunit sa tanang kaso sa kidnapping ug hostage negotiations sa tibuok nasod.(ATR/PIA9-Zambo Norte)
