ni Alfonso T. Ruda
DIPOLOG CITY, JAN. 2(PIA)--- Ang Bureau of Immigration nagpahinumdom karon sa tanang mga langyaw nga nia sa nasod nga moreport sa bureau sugod ugmang adlawa (Enero 3)para sa ilang tinuig nga personal nga pagpakita sa maong buhatan aron dili madeklarar nga mga improperly documented aliens.
Matod pa ni BI Commissioner Ricardo David, Jr., ang annual report gitakda ilalom sa Alien Registration Act of 1950 nga nagmando sa tanang langyaw nga moreport sa bureau sulod sa unang 60 ka adlaw sa matag tuig.
“Ang mapakyas,”matod pa ni David, “pahamtangan ug tukmang silot sama sa administraive finds ug ipailalom sa deportation proceedings. “
Matod pa ni BI Registration Division Chief nga ilalom sa Section 10 sa maong Akta, ang mga langyaw nga naghupot ug immigrant o non-immigrant visas kinahanglang mohimo ug annual report.
Gitambagan usab ni Ledesma ang mga langyaw nga direktang modulo sa kahera sa bureau, magbayad ug 300 pesos nga annual report fee ug 10 pesos nga legal research fees ug mangayo ug opisyal nga resibo aron dili mabiktima sa mga fixers.
Ilalom sa balaod, ang tanang langyaw nga mohimo ug annual report kinahanglang magdala sa Alien Certificate Registration, Identification Card ug Residence Certificate.
Ang langyaw nga naghupot sa daang paper-based ACR ug kang kansang visa dili exempted sa pagbayad sa immigration fees kinahanglang dili tugtang makahimo sa iyang annual report, hangtud nga dili siya maka-apply ug ACR-I Card.
Midugang pa si David nga kadtong mga langyaw nga nagpangidaron ug ubos sa 14 anyos ug 65 anyos pataas, obligasyon sa ilang mga ginikanan ug mga legal guardians, ug representante nga maoy mohimo ug annual report sa ilang ngalan.(ATR/PIA9-Zambo Norte)
