DIPOLOG CITY, JAN. 3, (PIA)--- Ang Malakanyang subling mipasalig sa katawhang Filipinhon nga padayong hatagan ug prayoridad ni Presidente Benigno Aquino III sa 2012 ang paghatag ug kauswagan sa kinabuhi sa katawhan ug pagpalambo sa ekonomiya sa nasod, uban ang padayong pagpakig-gubat batok sa korupsyon sa gobyerno.
Sa gipahigayong labing unang media briefing karong tuiga, subling gipahayag ni Presidential spokesperson Edwin Lacierda ang nahaunang gisaad ni Presidente Aquino sa iyang mensahe sa pagtapos sa tuig 2011.
“Padayong tutukan sa Presidente ang pagpalambo sa ekonomiya sa nasod subay sa iyang gisaad sa katawhan sa iyang mensahe sa pagtapos sa 2011, atong palamboon ang ekonomiya, ug padayong ihatod ang serbisyo sa kabus natong mga kaigsoonan, ug ang atong adbokasiya batok sa korupsyon usab magpadayon,” matod pa ni Lacierda.
Kabahin sa impeachment proceedings batok kang Supreme Court Chief Justice Renato Corona nga giingong maka-apektar sa performance sa Hepe Ehikutibo, si Lacierda mipasalig nga kining maong Konstitusyonal nga proseso, sa bisan unsa mang paagi, dili mahimong babag sa tinguha sa Pamuno Nasod nga silbihan ang nasod ug ang katawhan.
Matod pa ni Lacierda, nabalhin na karon ang atensyon sa Senado, sanglit naduso naman sa kongreso ngadto sa Senado ang kasong impeachment batok kang Corona. Gumikan niini, walay rason nga maapektahan pa niini ang mga programa sa Presidente.
Mahinumdoman, nga niadtong Disyembre 12, 2011, gipirmahan sa 188 ka mga membro sa Ubos Balay-Balaoranan impeachment complaint batok kang Supreme Court Chief Justice Corona, nga sa ulahing bahin nasang-at usab sa Senado.(ATR/PIA9-Zambo Norte)
