ni Franklin P. Gumapon
DIPOLOG CITY, Dec. 26 (PIA) - - Tungod kay ang nasud sa Pilipinas kanunay’ng gihulga sa mga bagyo ug ubang matang sa kalamidad, gipadas-ug karon sa usa ka kongresista nga pahamtangan ug bug-at nga silot ang masakpan nga nangawat o miguba sa mga ekipo nga gamiton sa pagkuha ug data kabahin sa lakat sa panahon, linog, pagbuto sa bulkan, tsunami ug ubang pang dili kasarangang lihok sa kinaiyahan.
Kini ang gipadas-og ni Agham party-list congressman Angelo Palmones, usa sa mga nagsuwat sa maong bala-odnon nga nagtinguha nga himoong “crime against the people,” ang pagpanghilabot ug pagpangawat sa mga government equipment alang sa bagyo, linog ug uban pa.
Ubos sa maong balaod-non ang government risk reduction and preparedness equipment naglangkob sa mga ekipo, parte niini nga maoy mokuha, mo-monitor sa mga meteorological and seismological data ug mga impormasyon nga maoy tan-awon sa dili pa mopagawas sa mga warning o weather advisories.
Ang makalapas ning maong bala-od mabilanggo gikan sa 12 ngadto sa 15 ka tuig o makabayad gikan sa P1 million to P3 million depende sa desisyon sa korte.
Kadtong mosuway pagpanghilabot sa mga nasampit nga ekipo, mabilanggo sulod sa unom ngadto sa 10 ka tuig o makabayad sa P500,000 ngadto sa P1 million depende sa desisyon sa korte.
Sa laing bahin, adunay pahalipay nga ihatag niadtong mga tawo nga makasumbong kon si kinsa ang nanghilabot sa mga ekipo nga gamiton sa pagpaniid sa dagan sa panahon.
Ang mga co-author ni Palmones sa maong bala-odnon mao sila si Cong. Erico Aumentado sa Bohol, Romeo Federico Quimbo sa Marikina, Homer Merkado sa 1-UTAK party-list, Tomas Apacible sa Batangay ug Rachel del Mar sa Sugbu. (FPG/PIA-Zamboanga del Norte)
