ni Alfonso T. Ruda
DIPOLOG CITY, NOV. 8(PIA) -- Ang Office of the Presidential Adviser on the Peace Process nakatakdang magpagawas ug kalambuan ugmang adlawa may kalabutan sa gipahigayong pagpakignegosasyon sa gobyerno uban sa mga rebeldeng komunista ug Moro Islamic Liberation Front.
Makauban ni OPAPP Sec. Teresita Deles sa mga membro sa prensa ang mga hepe sa negosyador sa gobyerno nga nakigsabot sa CPP-NPA-NDF nga si Foreign Affairs Undersecretary Alexander Padilla ug Marvic Leonen nga nangulo sa mga negosyador sa gobyerno nga nakigsabot uban sa MILF.
Sumala pa sa OPAPP Advisory, si Leonen mohatag ug update sa bag-ohay pa lang gipahigayon nga informal talks didto sa Kuala lumpur, human ang nahitabong pag-atake didto sa Al-Barka, Basilan niadtong Oktubre 18 nga nagresulta sa kamatayon sa 19 ka mga sundalo ug pagkasamad sa 14 pang uban.
Si Padilla sa laing bahin, gilauman usab nga mohatag ug update sa media kon kanus-a posibling mapadayon ang negosasyon uban sa CPP-NPA-NDF.
Ang negosasyon sa uban sa CPP-NPA-NDF wala mahinayon dihang padayon nilang gipamugos ang pagbuhi sa mga binilanggong giingong ilang mga consultants sa di pa ipadayon ang negosasyon.
Ang media briefing nakatakdang ipahigayon didto sa Gateway Mall sa Cubao, Quezon City.
Si Presidential Communications Development and Strategic Planning Office Undersecretary Manuel L Quezon III ang natahasang mahimong moderator sa nasangpit nga press conference.(ALT/ATR/PIA9-Zambo Norte)
